Ўзбекистон Республикаси Ҳуқуқни муҳофаза қилиш академияси ташкил этилганининг бир йиллигига бағишланган халқаро илмий-амалий конференция ўз ишини бошлади
2023-йил 1-декабрь куни Тошкент шаҳрида Ўзбекистон Республикаси Ҳуқуқни муҳофаза қилиш академияси ташкил этилганининг бир йиллиги муносабати билан “Ҳуқуқни муҳофаза қилиш соҳасида юридик таълим ва фан: замонавий тенденциялар ва истиқболлар” мавзусида халқаро конференция бошланди. Унда Миллий гвардия қўмондони Р. Джураев ўз маърузаси билан иштирок этди.
Ўзбекистон Республикаси Бош прокуратураси томонидан ташкил этилган мазкур халқаро илмий-амалий конференцияси Ҳумо арена биносида бўлиб ўтди ва унда Миллий гвардия қўмондони генерал-майор Р. Джураев ўз маърузаси билан иштирок этиб, Янги Ўзбекистонда “Инсон қадри учун” деган эзгу ва муқаддас ғояни тўлақонли рўёбга чиқариш, мамлакатимизда қонун устуворлигини, адолат муқаррар эканлигини таъминлаш масаласига давлат сиёсати даражасида эътибор қаратилаётганига алоҳида урғу берди.
Шунингдек янгиланган конституциямизда инсон ҳуқуқ ва манфаатлари энг олий қадрият сифатида белгиланиб, “инсон-жамият-давлат” тамойилини амалиётга жорий этишнинг ҳуқуқий кафолатлари яратилгани ёдга олинди.
Бу эса аввало сўнгги йилларда аҳолининг ҳуқуқий ва сиёсий маданияти тубдан ошгани, халқимиз орасида юртимизнинг ёрқин келажагига, барқарор тараққиётга ишонч ҳиси янада кучайганлиги билан боғлиқлиги айтилиб, қонун устувор бўлган жамиятда инсонлар тинч ва фаровон ҳаёт кечириб, эртанги орзу-умидлари рўёби сари илдам ҳаракат қилишганига давлатчилик тарихи гувоҳлиги айтиб ўтилди.
Янги Ўзбекистонда “Қонун устувор, жазо муқаррар” деган ғояни кенг тарғиб этишда юридик фан ва таълимнинг ўрни ва аҳамияти нечоғлик юқори эканлиги ва бу борадаги ишларни янги босқичга олиб чиқиш муҳим аҳамият касб этиши юзасидан қатор мисоллар келтирилди.
Давлатимиз раҳбарининг 2022 йил 28 ноябрдаги тарихий фармонлари асосида Бош прокуратура академияси негизида Ҳуқуқни муҳофаза қилиш академиясининг ташкил этилиши, муассасага таълим ва илмий-тадқиқот муассасаси мақомининг берилиши ҳам мақсадли ислоҳотларнинг амалий ифодаси эканлиги таъкидланди.
Шу вақтга қадар Ўзбекистонда терговчиларни тайёрлаш ва уларнинг касбий малакаларини ошириш бўйича ягона марказлаштирилган тизим мавжуд бўлмаганлиги айтилиб, Академия ташкил этилиши билан мазкур масала тўлақонли ўз ечимини топиб, замон талаблари ва халқаро стандартлар асосида суриштирув ҳамда тергов идоралари учун жиноятларни тергов қилиш соҳасида мутахассислар тайёрлаш, қайта тайёрлаш ва малакасини узлуксиз ошириб боришнинг янги ва самарали тизими яратилиб, Таълим ва илмий тадқиқот муассасалари, хусусан Жамоат хавфсизлиги университети билан яқин муносабатлар ўрнатилгани ва унинг аҳамиятига тавсиф берилди.
Миллий гвардия қўмондони фурсатдан фойдаланиб, академия ташкил этилганлигининг бир йиллик байрами билан барча ходим ва хизматчиларни, уларнинг оила аъзоларини самимий табриклаб, инсон ҳуқуқ ва манфаатларини ишончли ҳимоя қиладиган мард, жасур ва ватанпарвар кадрларни тайёрлаш йўлида муваффақиятлар тилади.
