Тадбир олдидан Қўл жанги федерациясининг Маъмурий биноси очилишига бағишланган тантанали маросим бўлиб ўтди. Миллий гвардия Маънавият ва маърифат маркази қошида қуриб фойдаланишга топширилган мазкур бино эндиликда Ўзбекистон ҳамда Осиё Қўл жанги федерацияси раҳбариятининг фаолият олиб боришлари учун мўлжалланган Марказ сифатида хизмат қилади. Шунингдек, Халқаро ҳамкорлик учрашувлари, мураббий ва ҳакамларнинг барча йиғинлари ушбу марказда ташкил этилади.

Фойдаланишга топширилган Қўл жанги федерацияси биносининг мажлислар залида илк бор ўтказилган йиғилиш эса Федерациянинг 2024 йил сарҳисоби ҳамда 2025 йил учун устувор вазифаларига бағишланди. Мазкур йиғилиш Ўзбекистон ҳуқуқни муҳофаза қилиш органлари Қўл жанги федерацияси раиси-Миллий гвардия қўмондони Р.Джураев раислигида ўтказилди.  

Таҳлилий ва танқидий руҳда бўлиб ўтган видеоселектор тарзидаги йиғилишда Спорт вазирининг ўринбосари Ш.Махмудов, Қўл жанги федерацияси ҳамда Миллий гвардия мутасадди раҳбарлари, федерациянинг таркибий ва ҳудудий бўлинма бошлиқлари, мураббийлар ҳамда таклиф қилинган соҳага оид мутасаддилар иштирок этишди.  

Федерация раиси кириш сўзида, Давлатимиз раҳбарининг “Қўл жанги спорт турини янада ривожлантириш чора-тадбирлари тўғриси”даги 2022 йил 20 июндаги 287-сон Қарори билан, юртимизда “Қўл жанги” спорт турини ривожлантириш, унинг моддий-техник базасини такомиллаштириш, ушбу спорт турини ёшлар орасида оммалаштириш борасида кенг эшиклар очиб бериш билан бирга, муҳим вазифалар белгилаб берилганлиги ва унинг амалий ижросига қаратилган чора-тадбирлар юзасидан сўз юритди.

Хусусан, ўтган 2024 йилда Спортчиларимизни мунтазам шуғулланишлари учун муносиб шароит яратиш мақсадида Миллий гвардия Маънавият ва маърифат маркази қошида барча имкониятларга эга бўлган Спорт зал қуриб фойдаланишга топширилганлиги, бугун эса мазкур Спорт марказининг ўзида Федерация маъмурий биносининг очилиш маросими бўлиб ўтганлиги таъкидланди.

Бу каби ишлар Қорақалпоғистон Республикаси ва Қашқадарё вилоятида ҳам амалга оширилиб Қўл жанги спорт базалари ҳозирда ўз фаолиятини юритиб келаётганлиги, шунингдек, Қўл жанги спорт турини ёшлар ўртасида оммалаштириш, уларни спортга жалб қилиш чора-тадбирлари натижасида мазкур спорт тури секциялари сони 284 тадан 400 тага етказилгани, уларда эса бугунги кунда 30 мингдан зиёд профессионал, ҳаваскор ва ёш спортчилар шуғулланиб келаётганига алоҳида урғу берилди.

Қўл жанги спорт турига қизиқиш нафақат Ўзбекистонимизда балки Осиё давлатларида ҳам ортиб бораётганлиги таъкидланиб, Давлатимиз раҳбарининг қўллаб-қувватлашлари натижасида бизнинг ташаббусимиз билан Осиё давлатларининг қўл жангчиларини бирлаштириш мақсадида ўтган йили “Осиё Қўл жанги федерацияси” ташкил этилганлиги ва унинг биринчи йиғилишида 30 га яқин Осиё давлатларидан вакиллар иштирок этганлиги, унда Осиё федерациясига раис этиб Ўзбекистон қўл жанги федерацияси раиси ўринбосари Б.Мирзақулов  сайланганлиги ёдга олинди.  

Ўтган йил давомида Федерация томонидан ёшлар ва ўсмирлар, катталар ҳамда профессионал спортчилар ўртасида Республика ва Халқаро мусобақалар ташкил этилганлиги, шунингдек Қирғизистоннинг Бишкек шаҳрида, Қозоғистоннинг Астана шаҳрида, Россия Федерациясининг Москва шаҳарларида ўтказилган мусобақаларда қўл жангчиларимиз юқори натижаларни қайд этиб, умумжамоа ҳисобида фақат биринчи ўринни эгаллаганликлари фахр билан тилга олинди.

 Федерация раиси Р.Джураев сўзи якунида, соҳа ривожига катта эътибор қаратиб, спортчиларга муносиб шарт-шароит яратиб бераётганликлари учун Мудофаа вазирлиги, Давлат хавфсизлиги хизмати, Ички ишлар вазирлиги, Президент давлат хавфсизлиги хизмати, Фавқулодда вазиятлар вазирлиги, Давлат Божхона қўмитаси ҳамда Спорт вазирлиги раҳбарларига, шунингдек, вилоятлар ҳокимларига ўз миннатдорчилигини билдирди.

Йиғилишда, федерация томонидан 2024 йил давомида эришилган ютуқлар билан бирга йўл қўйилган камчиликларга алоҳида тўхталиниб, вилоятлар кесимида танқидий кўриб чиқилди ва муҳокама қилинди. Мазкур йўналишда Федерация раисининг биринчи ўринбосари Б.Соатов, Федерация раиси ўринбосари Б.Мирзақулов ҳамда кун тартибига киритилган (Хоразм, Қашқадарё,Сирдарё ва Тошкент вилоятлари) ижрочи директорларнинг маъруза ва ахборотлари тингланди.

Шунингдек, Спорт вазирининг ўринбосари Ш.Махмудов ҳам сўзга чиқиб, Федерация томонидан ўтган йилда амалга оширилган улкан ишлар ҳамда йиғилишда муҳокама қилинган масалалар юзасидан ўз фикр мулоҳазаларини билдирди.

Шу қаторда, Қўл жангини тизимли равишда ривожлантириб келаётган ҳудудий федерациялар фаолияти, хусусан намуна сифатида, Андижон вилояти ижрочи директори Р.Каримовнинг тажрибалари тингланди.

Шундан сўнг Спорт вазирининг буйруғи билан, мамлакатимизда ёш авлоднинг интеллектуал ва маънавий салоҳиятини юксалтириш, уларни она Ватанга муҳаббат, истиқлол ғояларига садоқат, миллий ва умуминсоний қадриятларга ҳурмат руҳида соғлом ва баркамол этиб вояга етказишга қўшган ҳиссаси, жисмоний тарбия ва спортни оммалаштириш, ёшлар ўртасида соғлом турмуш тарзини тарғиб қилишдаги хизматлари учун, Ўзбекистон ҳуқуқни муҳофаза қилиш органлари Қўл жанги федерацияси Жиззах вилояти бўлими ижрочи директори – Осиё Қўл жанги федерацияси Ҳакамлар Ҳайъати раиснинг биринчи ўринбосари Ҳ.Иргашев ҳамда Қўл жанги федерацияси Қорақалпоғистон республикаси бўлими раҳбари Е.Тихоновларга “Жисмоний тарбия ва спорт аълочиси” кўкрак-нишонлари топширилди. Шунингдек, Миллий гвардия қўмондонининг буйруғи ўқиб эшиттирилиб, унга кўра бир гуруҳ фидоий раҳбарлар ва мураббийлар муносиб рағбатлантирилди.

 Йиғилиш якунида Федерация раиси томонидан жорий йилда олдимизда турган муҳим устувор вазифалар санаб ўтилди. Энг асосийси жорий йилда ҳар бир вилоят федерациялари, Миллий гвардиянинг ҳудудий бошқармалари билан ҳамкорликда, туман марказлари ва чекка ҳудудлардаги мактабларда ҳам спорт секцияларини ташкил этиб, ёшларни айниқса ўқувчиларни жалб этган ҳолда “Қўл жанги” спорт турини янада ривожлантириш муҳим масала сифатида қайд этилди. Бунинг натижасида ёш ва истиқболли профессионал спортчиларимиз етишиб чиқиб жаҳон ареналарида байроғимиз доимо юқори кўтарилишига ишонч билдирилди.

Бу каби муҳим вазифаларни амалга ошириш юзасидан комплекс чора-тадбирлар ишлаб чиқилиши ва ижроси қатъий назоратга олиниши бўйича тегишли вазифалар белгиланиб, мутасадди раҳбарларга топшириқлар берилди.