Ўзбекистон Республикаси Конституцияси қабул қилинганлигининг 30 йиллик байрами кенг нишонламоқда.
Юртимизда Конституциямизда белгиланган қоида ва нормаларга асосан барча соҳаларда кенг кўламли ислоҳотлар амалга оширилиб, юксак натижаларга эришилмоқда. Бундай натижаларга фақатгина ҳуқуқий давлат шароитида эришилади, қадриятлар ҳаётга татбиқ этилади, инсон ҳуқуқ ва эркинликлари, энг асосийси, уларнинг ҳуқуқий ва ижтимоий ҳимояси амалда таъминланади.
Вазирлик ва идораларда, жамоат ташкилотларида сана муносабати билан тадбирлар ташкил этилиб, асосий қонунимизнинг мазмун моҳияти ёш авлодга чуқурроқ етказилмоқда. Тошкент шаҳар "Қўриқлаш" бошқармасида ҳарбий хизматчи ва ходимлар учун ҳам Миллий гвардия қўмондони ўринбосари, Ўзбекистон Республикаси Ҳарбий суди ва Ҳарбий прокуратура раҳбариятлари иштирокида "Конституция – менинг тақдиримда" шиори остида анжуман ўтказилди.
Мазкур анжуман давомида тадбирга ташриф буюрган меҳмонлар томонидан конституциямиз тўғрисида кўплаб мазмунли маърузалар қилинди.
Ўтказилган тадбирда ZOOM платформаси орқали иштирок этган ҳарбий хизматчи ва ходимлар ҳам бу борада ўз фикр ва мулоҳазаларини билдириб ўтишди. Шунингдек, анжуман бевосита ёшлар билан эркин савол-жавоблар тарзида бўлиб ўтди. Маърузачилар ёш муддатли ҳарбий хизматчиларга Ўзбекистон Республикасининг хавфсизлигини таъминлашдек муҳим масала Конституция асосида амалга оширилаётганини таъкидлаб, асосий қонунимизда Ватан ҳимояси - ҳар бир фуқаронинг бурчи эканлиги алоҳида қайд этишди.
