ПИРОТЕХНИКА ВОСИТАЛАРИНИНГ НОҚОНУНИЙ САВДОСИ ОЛДИ ОЛИНДИ
Бугунги кунда мамлакатимиз бўйлаб Миллий гвардия ҳамда ҳамкор вазирликлар билан биргаликда амалга оширилаётган “Комплекс” чора-тадбирлар натижасида пиротехника воситалари билан боғлиқ кўнгилсизликлар олди олинмоқда.
Хусусан, жорий йилнинг 7 ноябрь куни Фарғона вилоятида Миллий гвардия ва вилоят божхона бошқармаси ходимлари биргаликда тезкор тадбир ўтказилди.
Тадбир давомида Марғилон шаҳрида истиқомат қилувчи фуқаро Қ.А томонидан “Cobalt” русумли автомашинасида Қирғизистон Республикасидан яширинча йўл билан олиб ўтилган, 57 600 000 сўм миқдорида бўлган 230400 дона “БРИТАНИК” номли пиротехника воситалари ашёвий далиллар билан қўлга олинди.
Ҳозирда мазкур ҳолат юзасидан дастлабки тергов-суриштирув ишлари Фарғона вилояти божхона бошқармаси томонидан олиб борилмоқда. Шунингдек, куни кеча Миллий гвардия Наманган вилояти бўйича бошқармаси ҳарбий хизматчилари томонидан ушбу вилоятда истиқомат қилувчи фуқаро Т.Ж. шубҳа уйғотиб текширилганда, ёнидан умумий қиймати 2 400 000 сўм бўлган 480 қути «Новый век х201» («Британик») номли пиротехника воситаларини қонунга хилоф равишда сақлаб, олиб юрганлиги аниқланди.
Ҳозирда мазкур ҳолат юзасидан дастлабки тергов-суриштирув ишлари Миллий гвардия Наманган вилояти бўйича бошқармаси суриштирув бўлими томонидан олиб борилмоқда.
