ҒОЛИБЛАРИМИЗ ЯНА БИР БОР РАҒБАТЛАНТИРИЛДИ
Жорий йил 5-7 июнь кунлари юртимизда ўтказилган қўл жанги спорт тури бўйича VI-Жаҳон чемпионати мусобақаларида терма жамоамиз аъзолари муносиб қатнашиб, фахрли ўринларни қўлга киритишган эди.
Шу муносабат билан, бугун Ўзбекистон Республикаси Қўл жанги федерацияси раиси – Миллий гвардия қўмондони, генерал-майор Р.Джураев раҳбарлигида мусобақа ғолибларини тантанали тақдирлаш маросими бўлиб ўтди.
Унда федерация раиси ўринбосарлари, мураббийлар, чемпионат совриндорлари ҳамда Миллий гвардия марказий девони шахсий таркиби ва ҳудудий бошқармалари ҳарбий хизматчилари онлайн тарзда иштирок этди.
Федерация раиси ўз нутқида сўнгги йилларда барча яккакураш спорт турлари қатори, қўл жанги спорт тури ҳам дунё миқёсида кенг оммалашиб, ёшлар ўртасида профессионал даражада шуғулланишга қизиқиш тобора ортаётганлиги – федерация томонидан амалга оширилаётган салмоқли ишлар натижаси эканлигини айтиб ўтди.
Шунингдек, тадбирда юртимизда илк маротаба ўтказилган Жаҳон чемпионатининг якуний натижалари бўйича ижобий фикрлар билдирилиб, келгусида бўлиб ўтадиган муҳим мусобақаларда ҳам шу каби марраларни забт этиш лозимлиги таъкидланди.
Шундан сўнг, маросимнинг асосий қисмида ғалабага ўз ҳиссасини қўшган барча спорт усталари, мураббийлар, федерациянинг ҳудудий тузилмалари масъуллари I ва II даражали “Намунали хизматлари учун” кўкрак нишонлари ҳамда фахрий ёрлиқлар билан тақдирланди.
Шу билан бирга, Миллий гвардия қўмондони буйруғи билан мусобақада ишончли ғалабага эришган тизимнинг бир қатор ҳарбий хизматчиларига “Алвон берет” кийиш ҳуқуқи ҳамда навбатдаги ҳарбий унвонлар тантанали равишда топширилди.
Ҳеч бир нарса мамлакатни спортчалик дунёга машҳур қила олмаслиги ҳақиқатдир. Айни дамда Ўзбекистон байроғини баланд кўтариб, юртимиз довруғини кенг ёйилишига муносиб ҳисса қўшган ёш спортчиларимизни яна бир бор рағбатлантирилиши, уларнинг келгусида жаҳон ареналарида янада юқори кўтарилишига далда бўлиши шубҳасиздир.
