Давлатимиз раҳбарининг ҳудудларда аҳоли муаммоларини аниқлаш ва бартараф этиш ҳамда криминоген вазият барқарорлигини таъминлаш юзасидан берган топшириқларининг ижроси Навоий вилоятида Миллий гвардия қўмондони генерал-майор Р.Джураев бошчилигидаги идоралараро ишчи гуруҳ томонидан ўрганилиб, амалга оширилган ишлар натижаси сарҳисоб қилинди.
Бугун Навоий вилояти ҳокимияти биносида, Ишчи гуруҳ томонидан вилоят аҳолисининг турли йўналишларда аниқланган муаммолари ва уларни ҳал этиш юзасидан амалга оширилган ишлар натижалари сарҳисоб қилиниб, истиқболли режалар белгилаб олинди.
Вилоят ҳокими Н.Турсунов иштирокидаги мазкур йиғилишда, аҳоли муаммоларини ўрганиш ва уларни бартараф этишда белгилаб олинган 7 та асосий йўналишлар бўйича 4 та ишчи гуруҳга юклатилган вазифалар ижроси ҳамда ҳамкорликда амалга оширилган ишлар муҳокама қилинди.
Ташкил этилган тезкор штабда ишчи гуруҳлар томонидан аниқланган муаммоли масалалар қайта таҳлил қилиниб, уларни ечими юзасидан ҳамкорликдаги йўл харитаси ишлаб чиққан ҳолда тизимли чора-тадбирлар амалга оширилиши юзасидан топшириқлар берилди.
Ишчи гуруҳ ташаббуси билан вилоят ҳудудида жами 9984 та хонадонга суюлтирилган газ балони ва 51,19 тонна кўмир етказиб берилиб, аҳолининг газ ва кўмир маҳсулотларига бўлган эҳтиёжи қисман қаноатлантирилди.
Истеъмол бозорларидаги нарх-наво барқарорлигини таъминлаш, озиқ-овқат захираларини яратиш ҳамда тадбиркорлар учун қулай шароитлар яратиш мақсадида, вилоятда 52 та арзонлаштирилган ярмарка ташкил этилиб, уларда жами 3254 тонна кундалик эҳтиёж истеъмол товарлари савдога қўйилди. Шунингдек, ўз маҳсулотини тўғридан-тўғри сотиш истагида бўлган 96 та фермер хўжалиги эгаларига ўз маҳаллаларида қишлоқ хўжалиги маҳсулотларини сотиш учун савдо расталари ташкил этишга кўмаклашилди.
Ишсизлик ва камбағалликни қисқартириш, оилавий тадбиркорлик, ёшлар ва аёлларнинг ташаббускор лойиҳаларига кўмаклашиш мақсадида, вилоят ҳудудида жойлашган барча мономарказлар, меҳнат ярмаркалари, коворкинг марказлари фаолиятининг натижадорлиги ўрганилиб, натижаси бўйича 208 нафар фуқаролар доимий иш ўринларига жойлаштирилди, 27 нафари касбга ўқитишга юборилди, 53 нафарига ишсизлик нафақаси тайинланди. Шунингдек, 609 нафар фуқаролар ўзини-ўзи банд қилиш, 15 нафари якка тартибдаги тадбиркорлик қилиш орқали меҳнатга жалб этилди.
Вилоят ҳудудида ҳаракат хавфсизлигини таъминлаш, йўловчи ва ҳайдовчиларга қулайликлар яратиш мақсадида қўшимча равишда 30 та йўл белгилари ўрнатилиб, 9 та светофор таъмирланди, 14 та жойда йўл белгиларини тиклаш каби бошқа бир қатор ишлар амалга оширилди.
Шу билан бирга, маҳалларда аҳолининг мурожаатлари билан ишлаш аҳволи ва уларни қаноатлантириш даражаси танқидий ўрганилиб, бугунги кунда жами 569 та маҳалла фуқаролар йиғинларида 34 та мобил давлат хизматлари кўрсатилди.
