Пойтахт кўчаларида Ўзбекистон Республикаси Давлат байроғи қабул қилинганининг 34 йиллиги муносабати билан “Бир Ватан, бир эл, бир байроқ” шиори остида Мудофаа вазирлиги ва Миллий гвардия ҳарбий бўлинмаларининг намойишкорона пиёда юришлари бўлиб ўтди.
Бугун Ўзбекистон Республикаси Давлат байроғи қабул қилинганининг 34 йиллиги муносабати билан пойтахтимизнинг асосий кўчаларида Мудофаа вазирлиги ва Миллий гвардия ҳарбий бўлинмаларининг тантанали юришлари ўтказилиб, кўплаб томошабинларни ўзига жалб қилди.
Тадбир “Ғалаба боғи” ёдгорлик мажмуасида бошланган бўлиб, ҳарбийларнинг маҳорат билан тайёрланган кўргазмали чиқишлари, саф кўринишлари ва уйғун ҳаракатлари байрамга ўзгача шукуҳ бағишлади. Ҳарбий оркестрнинг жўшқин куйлар остида бошланган юриш Сағбон ва Зарқайнар кўчалари орқали давом этди.
“Чорсу” бозори олди, Тошкент цирки ва Ўзбекистон давлат табиат музейи ёнидан ўтган ҳарбийлар кўплаб пойтахт аҳолиси ва меҳмонлари томонидан қизғин олқишлар билан кутиб олинди. Якуний манзил — “Халқлар дўстлиги” санъат саройи майдонида эса жанговар чиқишлар, ҳарбий чақириқлар ва ҳарбий оркестрнинг дифеле намойишлари томошабинларга унутилмас лаҳзаларни тақдим этди.
Айниқса, ёшлар тантанали марафонни олқишлар билан кузатиб, давлат рамзларига бўлган фахр ва ҳурмат туйғусини яна бир бор юксак даражада ҳис этдилар.
Ушбу тантанали юриш пойтахт аҳолисида катта таассурот уйғотиб, давлат рамзларига бўлган ҳурмат ва ғурурни яна бир бор юксалтирди.
