Пойтахтимиздаги "Заковат арена" мажмуасида, 30 июнь ёшлар куни муносабати билан Миллий гвардия ҳарбий хизматчи ва ходимлари, курсант ва ўқувчилари ўртасида “Заковат интеллектуал” турнири бўлиб ўтди.
Мазкур интеллектуал ўйинда тизимда фаолият олиб бораётган ходимлар, фахрийлар, Жамоат хавфсизлиги университети курсантлари ҳамда Темурбеклар мактаби ўқувчиларидан иборат 30 та жамоа иштирок этди. Турнирни Миллий гвардия қўмондони ўринбосари полковник С.Мамаюсупов, «Заковат» интеллектуал клуби нодавлат нотижорат ташкилоти директори А.Абдуллаев, Ёшлар ишлари агентлиги директори ўринбосари Д.Каттахоновалар кириш сўзлари билан очиб беришиб, жамоаларга омад тилашди.
Иштирокчиларнинг мантиқий билимларини ошириш ҳамда интеллектуал салоҳиятини юксалтириш мақсадида ташкил этилган турнир кўтаринки руҳда бошланди.
2 раунддан иборат бўлган ўйин давомида 12 тадан жами 24 та савол ўртага ташланди. Турли соҳага оид маълумотлардан тузилган саволларга барча жамоа аъзолари, тез ва тўғри жавоб беришга ҳаракат қилишди.
Тадбир давомида Жадидчилик ҳаракати сиймоларига бағишланган театрлаштирилган мусиқий асар намойиш этилиб, Миллий гвардия ашула ва рақс ансамбли хушовоз хонандалари томонидан ватанпарварлик рухидаги қўшиқлари куйланди.
Якуний натижаларга кўра фахрли 3-ўринга Алфраганус, 2-ўринга Эверест жамоалари муносиб кўрилган бўлса, 1-ўринни Жамоат хавфсизлиги университетининг Фаворит жамоаси қўлга киритди.
Соғлом рақобат ва дўстона руҳда ўтган “Заковат интеллектуал” турнири ғолиблари диплом, кубок ва эсдалик совғалари билан тақдирланди.
