ТРИАТЛОН СПОРТ ТУРИ БЎЙИЧА ВИЛОЯТ БИРИНЧИЛИГИ ЎТКАЗИЛДИ
Самарқанд вилоятида ҳуқуқни муҳофаза қилувчи органлар ўртасида спортнинг “Триатлон” тури бўйича вилоят биринчилиги мусобақаси бўлиб ўтди.
Ўзбекистон Республикаси Миллий гвардияси Самарқанд вилояти бўйича бошқармаси ҳамда “Динамо” жисмоний тарбия ва спорт жамияти вилоят Кенгаши ҳамкорлигида ташкил этилган ушбу мусобақада 7 та жамоадан таркиб топган, жами 21 нафар иштирокчи дастлаб 300 метрга сузиш, сўнгра 8000 метрга велосипед ҳайдаш ва 3000 метрга югуриш йўналиши бўйича куч синашишди.
Ҳуқуқни муҳофаза қилувчи органлар шахсий таркибларининг жисмоний тайёргарлигини ошириш, уларнинг кундалик турмушига жисмоний тарбия ва спортни кенг тадбиқ этишни мақсад қилган мусобақа сўнгида шахсий биринчиликда Миллий гвардия ҳарбий хизматчилари ва Қўриқлаш бошқармаси ходимларидан 1-ўринни Умаралиев Бахриддин, 2-ўринни Зайцев Дмитрий ва 3-ўринни Давронов Зафарлар қўлга киритди.
Шунингдек, умумжамоа ҳисобида 1-ўрин Миллий гвардия Самарқанд вилояти бўйича бошқармаси, 2-ўрин вилоят Давлат Хавфсизлик Хизмати ва 3-ўрин вилоят Ички Ишлар бошқармаси жамоаларига насиб этди.
Ғолиблар Миллий гвардия қўмондонининг ўринбосари полковник С.Д.Мамаюсупов ва Ички ишлар вазирининг ўринбосари генерал-майор Б.Ю.Мирзарахимовлар томонидан тақдирландилар.
