Бугун Қорақалпоғистон Республикаси Вазирлар Кенгашининг йиғилишлар залида Миллий гвардия қўмондони генерал-майор Р.Джураев раҳбарлигидаги идоралараро ишчи гуруҳнинг аҳоли муаммоларини ҳал этиш ва криминоген вазиятнинг барқарорлигини таъминлашга қаратилган вазифалар ижроси кўриб чиқилди.
Унда Қорақалпоғистон Республикаси Жўқорғи Кенгеси раиси А.Оринбаев, Вазирлар кенгаши раиси Ф.Эрманов, Ўзбекистон Республикаси ИИВ ўринбосари генерал-майор Б.Абдуллаев ҳамда идоралараро ишчи гуруҳ таркибидаги мутасадди раҳбарлар, шунингдек, ҳудудлардаги масъул идора вакиллари иштирок этишди.
Йиғилишни кириш сўзи билан Қорақалпоғистон Республикаси Жўқорғи Кенгеси раиси А.Оринбаев очиб берди ва давлатимиз раҳбарининг топшириқлари мазмун моҳиятига тўхталиб ўтди.
Миллий гвардия қўмондони томонидан амалга оширилаётган ишларга таҳлилий баҳо берилиб, идоралараро ишчи гуруҳ таркибига аъзо масъул вазирликларнинг мутасадди раҳбарларига соҳага оид бўлган йўналишлар бўйича мавжуд муаммоларни аниқлаш ва ўз вақтида бартараф этиш чораларини кўриш юзасидан бир қатор вазифалар белгилаб берилди.
Мазкур вазифаларни бажариш давомида идоралараро ишчи гуруҳ томонидан аниқланган муаммоларни бартараф этиш бўйича аниқ таклифлар киритилди ва улар асосида йўл харитаси ишлаб чиқилиб, тизимли ишлар амалга оширилиши таъкидланди.
Шу билан бир қаторда, ишчи гуруҳ аъзолари Қорақалпоғистон Республикаси бўйлаб аҳоли муаммоларини ҳал этиш ва криминоген вазиятнинг барқарорлигини таъминлашда жойларга чиққан ҳолда, барча шаҳар-туманлар ҳамда маҳалла кесимида ишларни ташкил этишига алоҳида урғу берилди.
Шундан сўнг, идоралараро ишчи гуруҳ таркибидаги мутасадди раҳбарларнинг юқоридаги топшириқларга оид маърузалари ва фикр-мулоҳазалари тингланди.
Йиғилиш якунида Миллий гвардия қўмондони Идоралараро ишчи гуруҳ таркибига киритилган барча мутасаддилар давлатимиз раҳбари томонидан қўйилган вазифаларни сифатли бажаришига ва Қорақалпоғистон Республикасида аҳоли учун муносиб шароитлар яратишда орттирган юқори тажрибаси ва имкониятларидан тўла-тўкис фойдаланишига ишонч билдирди.