Қуролли Кучлар ва ҳуқуқни муҳофаза қилувчи органлари масъул ходимларининг учрашуви бўлиб ўтди
Мамлакатимиз аҳолисининг, айниқса ёш авлоднинг жисмоний тарбия ва спорт билан мунтазам шуғулланишлари, спортни янада оммалаштириш чора тадбирлари бўйича Қуролли Кучлар ва ҳуқуқни муҳофаза қилувчи органлари масъул ходимларининг учрашуви бўлиб ўтди ва ҳамкорликдаги истиқболли режалар кўриб чиқилди
Давлатимиз раҳбарининг 2021 йил 5 август кунидаги “Чавандозлар мактаблари фаолиятини ташкил этиш чора-тадбирлари тўғрисида”ги, “Ўзбекистонда йилқичилик, от спорти, замонавий бешкураш ва Полони 2025 йилгача ривожлантириш давлат дастури тўғрисида” ги ва “Сурхондарё вилоятида Қорабайир зотли отларни етиштириш ва оммалаштириш ҳамда от спорти турларини янада ривожлантириш чора-тадбирлари тўғрисида”ги Қарорлари ижроси юзасидан Миллий гвардия ҳамда ҳамкор вазирликлар, шунингдек жойлардаги вилоят, шаҳар ҳамда туман ҳокимликлари ҳамкорлигида тизимли ишлар йўлга қўйилди.
Шу борада, жорий йилнинг 9 ноябрь куни Миллий гвардия Марказий девонида Давлат хавфсизлик хизмати, Давлат божхона қўмитаси, Мудофаа ва Ички ишлар вазирликлари мутасадди раҳбарлари шунингдек, масъул федерациялар вакиллари иштирокидаги навбатдаги йиғилиш бўлиб ўтди. Мазкур учрашув давомида юқорида қайд этилган қарорлар ижроси юзасидан ҳамкорликдаги истиқболли режалар кўриб чиқилди ва “Қуролли Кучлар ва ҳуқуқни муҳофаза қилувчи органлар ўртасида ҳар йили от спорти турлари бўйича турнирларни ўтказиш тартибини белгилаш тўғрисида”ги қўшма қарор лойиҳаси муҳокама қилинди.
