Республикамиз бўйлаб ўтказилаётган «Қон топшир-ҳаёт инъом эт!» шиори остидаги беғараз донорлик акциясида ҳарбий хизматчи ва ходимлар фаол иштирок этди.
Бугунги сана муносабати билан Миллий гвардия ҳарбий хизматчи ва ходимлари томонидан «Қон топшир-ҳаёт инъом эт!» шиори остида беғараз донорлик акцияси бўлиб ўтди. Ушбу акциядан кўзланган мақсад тиббий-ижтимоий кўмакка муҳтожларни қўллаб-қувватлаш,ҳарбий хизматчиларни кўнгилли равишда қон топшириши орқали инсонларнинг ҳаётини сақлаб қолиш, жамиятда инсонпарварлик ва меҳр-оқибат ғояларини кенг тарғиб қилишдан иборат.
Таъкидлаш жоизки, беғараз донорлик акциясида турли касалликлар ёки бахтсиз ҳодисалар туфайли қонга муҳтож бўлган беморларга ҳаёт бағишлаш ва уларнинг соғайиб кетишларига ҳисса қўшишдек хайрли ҳамда савобли ишга бел боғлаган ҳарбий хизматчи ва ходимларимиз ихтиёрий равишда қон топширдилар.
Мазкур тадбир санитария-гигиена талабларига тўлиқ риоя этилган ҳолда, оғир бемор болаларни даволашга йўналтирилди.
Эзгуликнинг ёрқин намунаси бўлган бу каби тадбирлар инсонийликка хос бўлган олийжаноб фазилатлардан биридир. Албатта, инсон ҳаётини асраб қолиш кўпинча қон қуйиш жараёни билан боғлиқ бўлиб, савобли амалларни ўзида жо этган тадбирлар замирида ҳам беморлар дардига шифо топиш, уларни соғлом ҳаётга қайтаришдек эзгуликлар мужассамдир.
