“Биз оилавий ўқиймиз” шиори остида кутубхонага саёҳат
Республика болалар кутубхонаси Тошкент шаҳри марказидаги замонавий ва кўп тармоқли жамоат маскани ҳисобланади. Шу боисдан ҳам ёзги таътил кунларини болажонлар мазмунли ва мароқли ўтказишини таъминлаш мақсадида илк маротаба Миллий гвардия ходимлари оила аъзолари иштирокида ушбу зиё масканига саёҳат уюштирилди.
Экскурсия давомида болалар ва ёшларнинг интеллектуал ва ижодий қобилиятларини юзага чиқариб, янада камол топтириш учун зарур бўлган барча қулайликлар яратилганлигига гувоҳ бўлишди. Республика болалар кутубхонасида 3 ёшдан 16 ёшгача бўлган ёш тоифаларига асосий эътибор қаратилган бўлиб, бу ерда, у ерда катталар учун бир-биридан қизиқарли турли хилдаги адабиётларни учратиш мумкин.
Кутубхона билан танишиш жараёнида Миллий гвардия ходимлари асосий эътиборни фарзандларининг қизиқишларига қаратишди. Улар билан бирга фарзандларига ёққан китоблар билан танишиш ва мутолаа қилиш имконига эга бўлишди. Ходимлар кутубхонадан унумли фойдаланиш мақсадида рўйхатдан ҳам ўтишди. Энди улар севимли асарларини 10 кун муддатга қадар уйига олиб бориб, оила даврасида мутолаа қилишлари мумкин бўлади.
Халқимиз азалдан илм-маърифатга интилган, китоб ўқишга қаттиқ муҳаббат қўйган. Республика болалар кутубхонасига уюштирилган саёҳатдан асосий мақсад ҳам ана шу анъаналарни фарзандларимизга етказиш ҳамда ходимлар орасида китобхонликни янада ошириш, соҳага оид янгидан янги асарлар билан танишишларига хизмат қилади.
