Республикамиз бўйлаб ўтказилаётган “Обод ва файзли маҳалла-юрт кўрки” шиори остидаги умумхалқ хайрия ҳашарида Миллий гвардия ҳарбий хизматчи ва уларнинг оила аъзолари фаол иштирок этмоқда
Бугун мамлакатимизда Наврўз умумхалқ байрамини муносиб нишонлаш, муборак Рамазон ойини қарши олишга тайёргарлик кўриш, маҳаллалар, аҳоли турар жойларини ободонлаштириш ва кўкаламзорлаштириш, аҳолининг ижтимоий ҳимояга муҳтож қатламларини қўллаб-қувватлаш мақсадида “Обод ва файзли маҳалла- юрт кўрки” шиори остида ободонлаштириш ва кўкаламзорлаштириш умумхалқ хайрия ҳашари бўлиб ўтмоқда.
Уй-жойлар, кўчаю ҳовлиларни озода, саранжом ҳолатда сақлаш халқимизнинг азалий қадриятларидан саналади.
Уюшқоқлик билан бошланган мазкур ҳашарда ёшу қари иштирок этиб, улар томонидан кенг кўламли ободонлаштириш ишлари олиб борилмоқда.
Ҳашар давомида маҳаллалар, аҳоли турар жойлари, гузарлар, хиёбонлар, зиёратгоҳлар, мўътабар масканлар, болалар майдончалари тартибга келтирилди. Ободонлаштириш, кўкаламзорлаштириш ишлари Миллий гвардия ҳарбий хизматчи ва ходимлари, шунингдек, уларнинг оила аъзолари томонидан янада фаол олиб борилди.
Юртимизда жадал суръатда олиб борилаётган "Яшил макон" умуммиллий лойиҳаси доирасида ҳам барча турар жой мавзелари, маҳаллаларда гул кўчатлари, манзарали ва мевали дарахтлар экиш, оқлаш ва буташ ишлари амалга оширилди.
Шуни алоҳида таъкидлаш жоизки, ижтимоий ҳимояга муҳтож аҳоли қатламлари, эҳтиёжманд, боқувчисини йўқотган кекса ва ногиронлиги бўлган фуқароларнинг уй-жойларини тартибга келтириш ва тозалашга алоҳида эътибор қаратилди.
Бир сўз билан айтганда, “Обод ва файзли маҳалла- юрт кўрки” шиори остида ўтказилаётган умумхалқ хайрия ҳашарида юртдошларимиз аҳил, ҳамжиҳатликда иштирок этиб, ватанимиз ободлиги йўлида ўз ҳиссаларини қўшдилар.