Республика миқёсида ўтказилган "Янги нафас" оммавий югуриш мусобақаларида Миллий гвардия ҳарбий хизматчи ва ходимлари фаол иштирок этишди.
Жорий йилнинг 12 март куни Наврўз умумхалқ байрами муносабати билан Республикамиз бўйлаб "Янги нафас" оммавий югуриш мусобақаси бўлиб ўтди. Мазкур мусобақа Республика ёшлар сиёсати ва спорт вазирлиги, Миллий олимпия қўмитаси ҳамда енгил атлетика федерацияси каби қатор ташкилотлар билан ҳамкорликда ўтказилди. Барча иштирокчилар қатори марафонда Миллий гвардия ҳарбий хизматчи ва ходимлари ҳам муносиб иштирок этишди. Шу билан бир қаторда, масъул вазирликлар ҳамкорлигида жамоат тартиби сақланди ва фуқаролар хавфсизлиги таъминланиб, тадбирнинг байрамона кайфиятда ўтиши назоратга олинди.
Таъкидлаш жоизки бу каби марафонларнинг ўтказилиши фуқароларнинг саломатлигига бўлган эътибор ва ғамхўрликни кучайтириш, уларни соғлом турмуш тарзига ўргатиш, айниқса, ёшларимизни бир мақсад сари бирлаштириш, қолаверса, спортнинг турли кўринишларида ёш истеъдодларни етиштириб чиқаришга кенг замин яратмоқда.
