Республикамиз бўйлаб пиротехника воситалари савдосига қарши ҳамкорликдаги профилактик тадбирлар давом этмоқда
Жорий йилнинг 25 ноябрь куни Миллий гвардия Тошкент шаҳри бўйича бошқармаси ҳарбий хизматчилари томонидан “Чорсу” бозорида сертификатсиз пиротехника воситаларини сотаётган самарқандлик 18 ёшли фуқаро М. Р. қўлга олинди. Холислар иштирокида ўтказилган тинтув чоғида унинг ёнидан 40 дона “Фриcтион” гиёҳвандлик моддаси топилиб, мусодара қилинди. Мазкур ҳолат бўйича суриштирув ишлари Шайхонтоҳур тумани ИИБ ходимлари томонидан олиб борилмоқда.
***
БУХОРО ВИЛОЯТИ.
Миллий гвардия Бухоро вилояти бўйича бошқармаси ҳарбий хизматчилари, Давлат божхона қўмитаси вилоят бошқармаси ва Ички ишлар органлари ходимлари ҳамкорлигида ўтказилган тадбирлар давомида фуқаро О.С. ноқонуний пиротехника маҳсулотларини сотаётганлиги аниқланди.
Шофиркон туманида яшовчи яна бир фуқаро Р.С. 340 дона “Трения” ва 60 қути “Британик” номли пиротехника воситаларини 4 миллион 800 минг сўмга сотишни режалаштирган. Аммо режалари амалга ошмади: фуқаро Р.С. Миллий гвардия Бухоро вилояти бўйича бошқармаси ҳарбий хизматчилари ва вилоят Божхона бошқармаси ходимлари томонидан қўлга олинди. Ҳуқуқбузарнинг сўзларига кўра, у пиротехника воситаларини ўтган йилнинг декабр ойида пойтахтдаги “Қўйлиқ” деҳқон бозоридан сотиб олган.
Шунингдек, шу куннинг ўзида Бухоро шаҳрида яна бир фуқаро Р.Н.жами 4800 дона пиротехника маҳсулоти бўлган 8 дона блокни сотаётган вақтида қўлга олинди.
21 ноябрь куни Миллий гвардия ҳарбий хизматчилари ва Божхона бошқармаси ходимлари томонидан ноқонуний пиротехника воситаларининг яна бир сотувчиси аниқланди. Бухоро шаҳрида яшовчи фуқаро “Буюк ипак йўли” банки ёнида пиротехника савдоси билан шуғулланаётган вақтида қўлга олинди. Холислар иштирокида кўздан кечирилганда ҳуқуқбузарнинг ёнида бўлган пакет ичидан 40 дона “Трения” ва “Британик”номли пиротехника воситалари топилди.
***
САМАРҚАНД ВИЛОЯТИ.
24 ноябрь куни Миллий гвардия Самарқанд вилояти бўйича бошқармаси ҳарбий хизматчилари, Ички ишлар органлари, Божхона бошқармаси ва Давлат хавфсизлик хизмати ходимлари томонидан ўтказилган қўшма рейд давомида Самарқанд вилоятида фуқаро Р.Б. умумий қиймати 1 миллион 600 минг сўмга 6 минг дона “Трения” номли пиротехника мпҳсулотларини сотаётган вақтида қўлга олинди.
Юқоридаги ҳар бир маълумот бўйича ҳуқуқбузарлик тўғрисида баённомалар расмийлаштирилди.
Ҳурматли юртдошлар!
Шуни эслатиб ўтамизки, пиротехника маҳсулотлари билан ноқонуний савдо қилиш Ўзбекистон Республикаси Маъмурий жавобгарлик тўғрисидаги кодексининг 185-1-моддаси бўйича ашёлар мусодара қилиниб, беш бараваридан йигирма бараваригача миқдорда жарима солишга сабаб бўлади.
Пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, худди шунингдек уларни қонунга хилоф равишда Ўзбекистон Республикасига олиб кириш (Ўзбекистон Республикасидан олиб чиқиш) ёки ўтказиш анча миқдорда ёхуд шундай ҳаракатлар маъмурий жазо қўлланилганидан кейин содир этилган бўлса, Ўзбекистон Республикаси Жиноят кодексининг 250-1-моддасига асосан жиноий жавобгарликка тортилади.
