Ўзбекистонда ёшлар масаласи давлат сиёсатининг энг устувор йўналишларидан бири бўлиб, юртбошимиз томонидан ушбу йўналишга алоҳида эътибор қаратилмоқда. Хусусан, "Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида"ги Қарорда ёшлар билан ишлашнинг янгича тизими жорий этилиб,унда аниқ мақсад ва истиқболли режалар белгилаб берилган.
Мазкур йўналишда Миллий гвардия томонидан амалга оширилиб келинаётган кенг кўламли ишлар қатори, республикамиз бўйлаб Миллий гвардияга бириктирилган 56 та умумтаълим мактабларининг махсус синф ўқувчилари ўртасидаги "Ёш гвардиячи" ҳарбий-спорт мусобақасининг, Ўзбекистон Республикаси Халқ таълими, Ёшлар иттифоқи ва Миллий гвардия ҳамкорлигида ўтказиб келинаётганлиги ҳам муҳим аҳамият касб этади.
Жорий йилда ҳам мазкур мусобақа вилоятларда юқори савияда ташкиллаштирилиб, муваффақиятли ўтган 16 та жамоа республика босқичига етиб келди ва ушбу йил илк маротаба Сирдарё вилояти Бахт шаҳридаги Республика ўғил болалар ўқув-тарбия муассасаси жамоаси ҳам қўшилди. Ўқувчиларнинг интеллектуал билимлари, жисмоний ва жанговар кўникмалари бўйича ўзаро қизғин беллашувлар остида ва дўстона рухда давом этган ушбу мусобақа ўз якунига етди ва ғолиблар аниқланди.
Ғолиб жамоаларни тантанали тақдирлаш маросимида Миллий гвардия қўмондони Р.Джураев, Халқ таълими вазирининг ўринбосари В.Ражабов, Ёшлар иттифоқи Марказий кенгаши вакили ва бошқа мутасадди раҳбарлар иштирок этишди.
Мазкур мусобақада 3-ўринни эгаллаган Андижон вилоятининг 48-мактаб жамоаси, 2-ўринни эгаллаган Қорақалпоғистон Республикасининг 18-мактаб жамоаси ва 1-ўринни эгаллаб мутлақ ғолиб бўлган Навоий вилоятининг
1-мактаб жамоаси ўқувчиларига диплом, кубок ҳамда қимматбаҳо совғалар топширилди. Шунингдек, мусобақада фаол иштирок этган ўқувчилар ва жамоа таркиби турли номинациялар бўйича муносиб тақдирландилар.
Мазкур тадбирларни ўтказишдан асосий кўзланган мақсад, ёшларни ватанпарвар ва фидойи этиб тарбиялаш, ўтказилаётган мазкур мусобақалар орқали уларни спортга бўлган қизиқишларини янада ошириш, қобилияти ва истеъдодларини рўёбга чиқариш ҳамда ҳаётга тўғри йўналтиришдан иборат.