Миллий гвардия Қўриқлаш Бош бошқармасининг замон талабларига мос бўлган янги биноси Қўриқлаш хизматининг 70 йиллиги арафасида фойдаланишга топширилди. Бу ўзига хос рамзий маъно касб этиб, Қўриқлаш ходимлари учун эсда қоларли воқеа бўлди.

Мазкур тантанали маросимда Миллий гвардия қўмондони, генерал-майор Р.Джураев, қўмондон ўринбосари, полковник М.Ғаниев, Беларусь Республикаси ИИВ Қўриқлаш департаменти бошлиғи, милиция генерал-майори А.Шепелев, тизим фахрийлари, шунингдек, Қўриқлаш бош бошқармаси шахсий таркиби ҳамда янги бинони қуришда иштирок этган пудратчи ташкилот вакиллари иштирок этдилар.

Генерал-майор Р.Джураев ўзининг кириш сўзида фойдаланишга топширилаётган ушбу янги бино шахсий таркиб учун муносиб совға эканини таъкидлаб, бунда яратилган шарт-шароитлар ва яратилган техник имкониятлар барча ходимларга янада куч-қувват ва шижоат бағишлашига ишонч билдирди.

Тадбир давомида Миллий гвардия қўмондонининг буйруғига кўра, меҳмонларга ва фахрийларга, шунингдек хизмат фаолияти давомида юқори натижаларга эришиб келаётган бир гуруҳ ходимларга "Намунали хизматлари учун" ҳамда "Миллий гвардия фидойи ходими" кўкрак нишонлари, шунингдек, фахрий ёрлиқлар топширилди.

Шундан сўнг, рамзий тасма кесилиб, ташриф буюрган меҳмонлар янги бинода яратилган шарт-шароит ва қулайликлар билан яқиндан танишдилар.

Хусусан, Қўриқлаш бош бошқармасининг янги ташкил этилган Ахборот таҳлил ва мониторинг маркази иштирокчиларнинг эътиборини тортди. Ахборот таҳлил ва мониторинг маркази катта ҳажмли кузатув экрани билан жиҳозланган, сўнги русумдаги ва етарлича хотира қувватига эга бўлган сервер қурилмалари ўрнатилган бўлиб, реал вақт режимида қўриқловдаги объектларга кириб-чиқишни ҳамда техник қўриқлаш воситаларининг жорий ҳолатини назорат қилиш, тезкор ҳаракатланувчи гуруҳлар, ҳудудий бўлинмалар навбатчилик қисмлари фаолиятини кузатиб бориш, бошқариш, шунингдек, ҳуқуқни муҳофаза қилувчи бошқа органлар билан тезкор алоқа қилиш тизими билан таъминланган.

Шунингдек, бинода "Қўриқлаш бош бошқармаси тарихи музейи" ташкил этилган бўлиб, қизиқарли тарзда расмийлаштирилган экспонатлар, фотосуратлар, тарихий ҳужжатлар мамлакатда жисмоний ва техник қўриқлаш тарихини акс эттириб, 70 йиллик залворли йўлни босиб ўтган Қўриқлаш хизмати фаолиятидан ҳикоя қилади.

Тадбир сўнгида Миллий гвардия қўмондони, генерал-майор Р.Джураевнинг Ўзбекистонга расмий ташриф билан келган Беларусь Республикаси Ички ишлар вазирлиги Қўриқлаш департаменти бошлиғи, милиция генерал-майори А.Шепелев бошчилигидаги делегация билан расмий учрашуви бўлиб ўтди.

Халқаро ҳамкорликнинг тарихий саҳифаларидан ўрин олган ушбу учрашувда Қўриқлаш соҳасидаги ҳамкорлик истиқболлари, хусусан, ҳамкорликда янги техник қўриқлаш жиҳозлари, воситалари ва ускуналарини ишлаб чиқаришни йўлга қўйиш, ходимлар малакасини ошириш масалалари атрофлича муҳокама этилди ва келишувларга эришилди.