Самарқанд шаҳрида хавфсиз муҳитни яратиш ва жамоат хавфсизлигини ишончли таъминлаш бўйича манзилли ишлар амалга оширилди
Давлатимиз раҳбари томонидан Тошкент шаҳрида хавфсиз муҳитни барпо этиш ҳамда жамоат хавфсизлигини таъминлашга қаратилган намунавий амалиётни жорий этиш борасида белгилаб берилган устувор вазифаларнинг амалий ижроси Самарқанд вилоятида ҳам давом эттирилиб Миллий гвардия қўмондони генерал-полковник Б.Ташматов томонидан манзилли ишлар олиб борилди.
Мазкур вазифаларнинг юқори даражада бажарилиши юзасидан Миллий гвардия Самарқанд вилояти бўйича бошқармаси шахсий таркибнинг тайёргарлиги ва жанговар шайлиги, шунингдек, замонавий қурол-аслаҳа ҳамда махсус воситалардан фойдаланиш кўникмалари кўздан кечирилди.
Хавфсизликни ишончли таъминлаш борасида командир ва бошлиқларнинг ахборотлари тингланиб, бу борада олиб борилаётган ўқув-тактик машғулотларни сунъий интеллект ва роботлаштириш элементлари асосида ташкил этиш бўйича аниқ вазифалар белгиланди.
Шунингдек, ҳарбий хизматчиларнинг доимий жанговар шайлигини таъминлаш, хавф-хатарларни ўз вақтида аниқлаш ва бартараф этиш борасидаги чора-тадбирларни янада такомиллаштириш, шунингдек, илғор жаҳон тажрибаларини амалиётга жорий этиш юзасидан тегишли топшириқлар берилди.
Ўрганиш ишлари давомида Миллий гвардия қўмондони генерал-полковник Б.Ташматов ва Ички ишлар вазири генерал-лейтенант А.Ташпулатов ҳамда ишчи гуруҳ аъзолари ҳамкорлигида Имом ал-Бухорий мажмуасида хавфсизликни таъминлашга қаратилган масалалар атрофлича ўрганилди. Яқин кунларда фойдаланишга топширилиши режалаштирилаётган мазкур мажмуага келиши кутилаётган маҳаллий ва хорижий сайёҳлар хавфсизлигини таъминлаш, улар учун хавфсиз, қулай ва замонавий шарт-шароитлар яратиш масалаларига алоҳида эътибор қаратилди, Хусусан, сайёҳлар оқими ортиб бориши инобатга олиниб автотураргоҳлар сиғимини кенгайтириш, транспорт ҳаракатини тартибга солиш ҳамда фавқулодда вазиятларнинг олдини олиш тизимини такомиллаштириш борасида масъулларга аниқ топшириқлар берилди. Шунингдек, ушбу ҳудудда жамоат хавфсизлигини таъминлаш мақсадида янгидан қурилиб битказилган Пайариқ тумани 2-сонли ички ишлар бўлинмасида ўрганиш ишлари олиб борилди. Унда хавфсиз туризмни таъминлаш бўйича ҳамкорликдаги узлуксиз хизматни ташкил этиш юзасидан зарур кўрсатмалар берилди. Имом Абу Мансур ал-Мотурудий мажмуасида амалга оширилаётган қурилиш ва ободонлаштириш ишлари ҳам кўздан кечирилиб, ушбу ҳудудда ҳам хавфсизликни таъминлаш масалалари муҳокама қилинди.
Кўҳна ва боқий Самарқандда туризм соҳасининг янада ривожланиши ҳудудда хавфсиз муҳитни ишончли таъминлаш, мазкур йўналишда эса ҳуқуқни муҳофаза қилиш органларининг ҳамкорликдаги хизматларини замон талабларига мос такомиллаштириб борилиши муҳим аҳамият касб этади. Хусусан, жиноятчиликнинг олдини олиш, уюшган жиноятчилик, гиёҳвандлик, кибержиноятчилик ва яширин иқтисодиётга қарши курашиш борасидаги профилактик ишлар самарадорлигини ошириш, шунингдек аҳоли билан ҳамкорликни кучайтиришга қаратилган чора-тадбирлар атрофлича кўриб чиқилди.
Шунингдек, Самарқанд шаҳри ҳамда туманларида жиноятчилик хавфи юқори бўлган маҳаллаларда олиб борилаётган ишлар, жумладан, патруллик хизмати фаолияти, видеокузатув тизимларининг самарадорлиги ва рақамли технологияларни жорий этиш ҳолати билан яқиндан танишилди. Ҳудудларда ўрнатилган кузатув камераларининг ситуацион марказлари билан интеграция қилингани ҳамда 24 соатлик хизмат ташкил этилгани бўйича мутасаддиларнинг ахборотлари тингланди.
Жамоат тартибини сақлашда замонавий ёндашувларни қўллаш, хусусан, патруллик фаолиятида дронлар ва интеллектуал таҳлил тизимларидан фойдаланиш имкониятлари муҳокама қилиниб, бу борада масъул раҳбарларга аниқ вазифалар юклатилди.
