Сирдарё вилоятида “Ёш гвардиячи” ҳарбий-спорт мусобақасининг вилоят босқичи бўлиб ўтди.
Ёшларни ҳарбий-ватанпарварлик руҳида тарбиялаш, улар ўртасида соғлом турмуш тарзини тарғиб қилиш, ўз юрти ва халқи тақдири учун юксак масъулият ва жавобгарлик каби муҳим хислатларни шакллантириш мақсадида Сирдарё вилоятида “Ёш гвардиячи” ҳарбий-спорт мусобақасининг вилоят босқичи бўлиб ўтди.
Мазкур мусобақа Сирдарё вилояти бўйича Миллий гвардия бошқармаси, Ёшлар Иттифоқи Сирдарё вилояти Кенгаши ва Халқ таълими вилоят бошқармаси ҳамкорлигида Миллий гвардияга бириктирилган умумий ўрта таълим муассасаларининг ҳарбий-ватанпарварлик йўналишига ихтисослаштирилган синф ўқувчилари ўртасида ташкил этилди.
Ўқувчилар жамоани таништириш шартига кўра беллашув, билимдонлар беллашуви, саф тайёргарлиги, қўл жанги усуллари, заҳарланган ҳудуддан ўтиш, автоматни нотўлиқ қисмларга ажратиш ва йиғиш, 400 метрга эстафета, биринчи тиббий ёрдам кўрсатиш, турникда тортилиш каби шартларда ўзаро беллашдилар. Мазкур шартлардан ташкил топган мусобақа юқори савияда ўтказилиб, ўзларининг шижоати ва эпчиллиги билан биринчиликни қўлга киритган жамоа - Сайҳунобод тумани 41-сонли ихтисослаштирилган умумтаълим мактаби ўқувчиларидан ташкил топган "Қоплон" жамоаси Республика босқичига йўлланмани қўлга киритишди.
Мусобақада иштирок этган жамоаларнинг фаол қатнашчиларига диплом ва эсдалик совғалари топширилди.
