СОҒЛОМ ОИЛА – СОҒЛОМ ЖАМИЯТ
Республикамиз бўйлаб вилоят ва туманларда жойлашган Соғлиқни сақлаш тиббиёт бирлашмалари ҳамда Миллий гвардия бўлинмалари ҳамкорлигида ҳарбий хизматчи ва ходимларнинг оила аъзолари учун “Соғлом оила – соғлом жамият” шиори остида чуқурлаштирилган тиббий кўрик ишлари давом этмоқда.
Хусусан, жорий йилнинг 11-12 май кунлари Тошкент вилояти Чирчиқ шаҳрида жойлашган Миллий гвардия ҳарбий қисмда шаҳар тиббиёт бирлашмаси Кўп тармоқли оилавий поликлиника мутахассис шифокорлари томонидан чуқурлаштирилган тиббий кўрик ташкил этилди.
Бунда педиатр, терапевт, офтальмолог, лор, невролог, эндокринолог каби шифокорлар кўриги, шунингдек УТТ ва ЭКГ текширувлари ҳам ўтказилди. Тиббий кўрик натижалари билан аниқланган бирламчи касалликлар бўйича соғломлаштириш ишларини олиб бориш учун шифокорлар томонидан керакли ва зарур бўлган тавсиялар берилди.
Шунингдек, асосий эътибор ҳарбийларнинг турмуш ўртоқлари ва фарзандларига қаратилгани боис, уларнинг тиббий маданиятини янада ошириш мақсадида якка тартибда профилактик суҳбатлар олиб борилиб, доимий равишда мурожаат қилишлари ҳамда шифокорлар билан мулоқотда бўлишлари учун йўлланмалар тақдим этилди.
Тадбир якунида Миллий гвардия мутасадди раҳбарлари томонидан тиббиёт ходимларига миннатдорчилик билдирилиб, келгусидаги ҳамкорлик масалалари келишиб олинди.
