Спортнинг кураш тури бўйича Миллий гвардия тизимида кучлилар аниқланди
Қадимий ва навқирон Бухоро шаҳри яна бир бор юртимиз спорт ихлосмандларини ўзига жамлади. Спортнинг миллий фахримиз бўлган кураш тури бўйича гвардиячилар ўртасида "Ўзбекистон Республикаси Миллий гвардияси биринчилиги" мусобақаси бўлиб ўтди.
Анъанавий тарзда ташкил этилган мазкур беллашувда мамлакатимизнинг турли ҳудудларидан ташриф буюрган 100 нафардан ортиқ гвардиячилар 8 та вазн тоифасида гилам устида баҳс олиб боришди. Мусобақа давомида ҳарбий спортчилар ўзларининг жисмоний тайёргарлиги, куч-қуввати ва профессионал маҳоратини намоён этиб, чаққонлик, ирода ва матонатларини синовдан ўтказишди. Ҳар бир ғалаба — йиллар давомида меҳнат билан эришилган натижанинг ифодаси бўлди.
Якуний натижаларга кўра, 1-ўринни Миллий гвардия Қорақалпоғистон Республикаси бўйича бошқармаси жамоаси эгаллади, 2-ўрин Миллий гвардиянинг Самарқанд вилояти бўйича бошқармаси жамоасига насиб этди, 3-ўрин эса 98244-сонли ҳарбий қисм жамоасига берилди.
Бундай спорт мусобақалари Миллий гвардия тизимида соғлом турмуш тарзини тарғиб қилиш, гвардиячиларнинг жисмоний тайёргарлигини мустаҳкамлаш ҳамда улар орасида соғлом рақобат муҳитини шакллантириб, дўстона алоқаларни мустаҳкамлашда муҳим омил бўлиб хизмат қилади.
