СПОРТНИНГ КИКБОКСИНГ ТУРИ БЎЙИЧА БАҲСЛАР ДАВОМ ЭТМОҚДА
Бухоро вилоятида спорт соҳасини ривожлантириш ҳамда ёш авлод онгида спортга бўлган қизиқишни янада ошириш мақсадида турли спорт мусобақалари ўтказилиб келинмоқда.
Хусусан, Ўзбекистон Республикаси Миллий гвардия Қўмондони ва Ўзбекистон Кикбоксинг Ассоциацияси Президентининг ҳамкорлик Меморандуми ижросини таъминлаш мақсадида, жорий йилнинг 23-24 июль кунлари Бухоро шаҳридаги “Амир Темур клуби” спорт мажмуасида спортнинг “Кикбоксинг” тури бўйича Миллий гвардия Бухоро вилояти бўйича бошқармаси бошлиғи Кубоги учун баҳслари бўлиб ўтди.
Жаҳон Кикбоксинг ташкилотлари ассоциацияси (WAKO) қоидаси асосида ва Олимпия тизими бўйича ўтказилган мазкур мусобақада 13-35 ёшли спортчилар ўртасида 20 та вазн тоифасида 200 дан зиёд ёшлар ҳамда ҳуқуқни муҳофаза қилувчи орган ходимлари ўзаро жанг ўтказди.
Қизғин ва муросасиз баҳсларга бой бўлган беллашувлар якунига кўра, умумжамоа ҳисобида 3-ўрин вилоят Кикбоксинг ассоциацияси жамоаси, 2-ўрин вилоят "Амир Темур клуби" жамоаси, фахрли 1-ўринни эса вилоят Миллий гвардия жамоаси қўлга киритди.
Беллашувлар сўнгида ўз вазн тоифасида устунликни қўлга киритган иштирокчилар диплом, медаль ҳамда қимматбаҳо совғалар билан тақдирланди.
