Сурхондарё вилоятида жиноятчиликни олдини олиш ва криминоген вазиятни барқарорлаштириш юзасидан ўрганиш ишлари олиб борилди
Давлатимиз раҳбари томонидан маҳаллаларни жиноятдан ҳоли ҳудудга айлантириш бўйича қабул қилинган қарорлар ижросини таъминлаш мақсадида Миллий гвардия қўмондони ўринбосари А.Сормонкулов раҳбарлигида Сурхондарё вилоятида ўрганиш ишлари амалга оширилди.
Хусусан, Термиз шаҳридаги “Алпомиш” ва “Бўстон” маҳаллаларида маҳалла еттилиги, шаҳар Ички ишлар бошқармаси раҳбарияти ҳамда маҳалла фаоллари билан учрашув ўтказилиб, қарорлар ижроси юзасидан амалга оширилаётган ишлар таҳлил қилинди. “Йўл харита”лари асосида жиноятчиликка қарши курашиш ва профилактик тадбирларни кучайтириш бўйича амалий таклифлар берилди.
Шунингдек, “қизил” тоифага киритилган Денов туманидаги “Ўрикзор” маҳалласидаги ҳолат атрофлича ўрганилди. 2025 йилда содир этилган жиноятлар таҳлил қилиниб, уларнинг келиб чиқиш сабаблари аниқланди. Хусусан, кузатув камераларининг етарли эмаслиги, профилактик ҳисобдаги шахслар билан ишларнинг суст ташкил этилгани каби омиллар жиноят содир этилишига шароит яратаётгани қайд этилди.
Ўрганишлар давомида маҳалла инфратузилмасини яхшилаш, жумладан, қўшимча видеокузатув камералари ўрнатиш, кўчаларни ёритиш тизимини кучайтириш, патруль хизматини йўлга қўйиш ҳамда тадбиркорлик объектларини техник қўриққа олиш бўйича аниқ топшириқлар берилди. Шунингдек, аҳоли, айниқса ёшлар, аёллар ва ишсизлар билан манзилли ишлашни кучайтириш зарурлиги таъкидланди.
Ўрганиш якунида маҳаллаларда хавфсиз муҳитни шакллантириш, жамоат тартибини таъминлаш ва “қизил” тоифадан чиқариш бўйича ҳамкорликда мақсадли чора-тадбирлар амалга оширилиши белгилаб олинди.
