“ТЕМУР ТУЗУКЛАРИ БИЛИМДОНИ” ИНТЕЛЛЕКТУАЛ ТАНЛОВИ БЎЛИБ ЎТДИ
Жорий йилнинг 6 апрель куни Ўзбекистон Республикаси Миллий Гвардияси Тошкент “Темурбеклар мактаби” ҳарбий академик лицейида “Темур тузуклари билимдони” танлови бўлиб ўтди.
Мазкур тадбирдан кўзланган мақсад - буюк саркарда Сохибқирон Амир Темурнинг бой маънавий меъросини, ҳарбий санъат, маданият, жаҳон цивилизациясига қўшган улкан ҳиссасини ўрганиш ҳамда келгуси авлодларга безавол етказиш, ибратли ҳаёти ва ижтимоий фаолиятини ҳар томонлама тарғиб этиш, ўқувчи ёшларнинг билимини мустаҳкамлаш ҳамда Амир Темур таваллудининг 685 йиллигини кўтаринки руҳда нишонлашдан иборат бўлди.
Танловда Ўзбекистон Республикаси Миллий гвардиясининг Тошкент “Темурбеклар мактаби” ҳарбий-академик лицейининг “Темурбек авлодлари”, Республика ихтисослаштирилган мусиқа академик лицейининг “Соҳибқирон”, Бахт ўғил болалар ўқув-тарбия муассасасининг “Ўзбекнинг забардаст баҳодирлари” ҳамда Ички ишлар вазирлигининг Ихтисослаштирилган мактаб-интернатининг “Соҳибқирон ворислари” жамоалари ўзаро беллашдилар.
Танлов уч шартдан иборат бўлиб, иштирокчилар Амир Темурнинг “Темур тузуклари” бўйича назарий билимлари синовдан ўтказилди. Жамоа аъзолари томонидан тайёрланган Соҳибқирон Амир Темурнинг ҳаёти ва ижоди, ҳарбий санъатига бағишланган саҳна кўринишлари барчада катта таассурот қолдирди.
“Темур тузуклари билимдони” кўрик-танловида иштирок этиш орқали ўқувчиларимиз қалбида буюк Соҳибқирон Амир Темурнинг адолатли давлат тузиш ҳақидаги ўгитлари чуқур сингдирилди, бу эса ўз навбатида Янги Ўзбекистоннинг Учинчи Ренессанс даврига мос мард, довюрак ва жасур ўғлонларни тарбиялашга хизмат қилади.
Танлов сўнгида ғолиб жамоалар диплом ҳамда эсдалик совғалари билан тақдирланди.
