Термизда Миллий гвардия тизимидаги полвонлар куч синашди
Жорий йилнинг 19-21 сентябрь кунлари Сурхондарё вилояти Термиз шаҳрида жойлашган "Сурхон арена" спорт мажмуасида спортнинг кураш тури бўйича Миллий гвардия биринчилиги мусобақаси ташкил этилди. Унда республикамизнинг барча ҳудудларида Миллий гвардия сафларида хизмат қилаётган ҳарбий хизматчилар ҳамда Қўриқлаш бош бошқармаси ходимлари иштирок этдилар. Мусобақанинг очилиш маросимида Миллий гвардия Сурхондарё вилояти бўйича бошқармаси бошлиғи ҳамда Ўзбекистон кураш федерацияси масъуллари сўз олиб, юртимизда кураш спорт турини ривожлантириш, унинг халқаро нуфузини ошириш борасида амалга оширилаётган ишлар хусусида тўхталиб, мазкур мусобақада қатнашаётган барча спортчиларга омад тиладилар. Шундан сўнг, 100 дан ортиқ полвонлар гиламга тушиб, 7 та вазн тоифасида ўз имкониятларини синаб кўрдилар. Иштирокчиларнинг баҳслари малакали ҳакамлар томонидан одилона бошқариб борилди. Ҳар бир баҳсларда полвонлар муросасиз кураш олиб боришди. Айтиш керакки, кейинги йилларда асрлар давомида мардлик, бағрикенглик, олижаноблик ва ҳалолликнинг тимсоли сифатида эъзозланиб келинган, ўзбек халқининг тарихий мероси – “Кураш” миллий спорт турини янада ривожлантириш ва тарғиб этишга алоҳида эътибор қаратилмоқда. Жумладан, Миллий гвардия тизимида ҳам ушбу спорт тури кенг оммалашиб, доимий равишда шуғулланиб келаётган, кўплаб нуфузли мусобақаларда иштирок этиб, фахрли ўринларни қўлга киритаётган полвонлар сафи кенгаймоқда. Қизғин курашларга бой бўлган мусобақада ҳам ҳар бир вазн тоифасида ғолиблар аниқланди. Тадбир якунида ғолиб ва совриндорлар ташкилотчилар томонидан биринчи, иккинчи, учинчи даражали диплом, медаль ва эсдалик совғалари билан тақдирландилар. Шунингдек, умумжамоа ҳисобидаги натижаларга кўра, Миллий гвардиянинг Тошкент вилоятида жойлашган ҳарбий қисми жамоаси учинчи ўринни, Қўриқлаш бош бошқармаси жамоаси иккинчи ўринни, Қорақалпоғистон республикаси Миллий гвардияси бошқармаси жамоаси фахрли биринчи ўринни қўлга киритиб, жамоаларга мусобақа кубоги тантанали равишда топширилди.
