Тиббиёт ходимлари куни муносабати билан Миллий гвардия тизимида хизмат олиб бораётган соҳа ходимларини муносиб тақдирлашга бағишланган тантанали тадбир бўлиб ўтди
Тантанали маросимда Миллий гвардия қўмондонлиги ҳамда тизимда сидқидилдан хизмат олиб бораётган тиббиёт ходимлари, шунингдек, ҳамкор вазирлик ва идоралардан вакиллар иштирок этди.
Дастлаб маросимда Миллий гвардия қўмондонининг жонкуяр соҳа мутахассислари учун байрам табриги ўқиб эшиттирилди.
Унда мамлакатимизда амалга оширилаётган ислоҳотлар билан бир қаторда Миллий гвардия тизимида ҳам тиббиёт соҳасида кенг қамровли ишлар амалга оширилиб, шахсий таркиб ҳамда уларнинг оила аъзоларига тиббий хизмат кўрсатиш янги босқичга олиб чиқилганлигига алоҳида урғу берилди. Нутқ давомида саломатликни асрашдек эзгу мақсад йўлидаги хизматлари учун барча касб эгаларига миннатдорчилик билдирилди.
Шундан сўнг, сана муносабати билан Миллий гвардия ҳарбий хизматчи ва ходимлари, уларнинг оила аъзоларини соғлиғини сақлаш ҳамда мустаҳкамлаш йўлида фидокорона хизмат қилиб келаётган соҳа ходимларини, шу билан бир қаторда ҳамкор вазирлик, идораларнинг тиббиёт ходимлари муносиб рағбатлантирилди.
Хусусан, юзга яқин Ўзбекистон Республикаси Миллий гвардиясининг “Аъло хизматлари учун”, Ўзбекистон Республикаси Миллий гвардияси фидойи ходими, Ўзбекистон Республикаси Миллий гвардиясининг III даражали “Намунали хизматлари учун” кўкрак нишонлар ҳамда фахрий ёрлиқ ва Миллий гвардия рамзи туширилган эсдалик совғалари қўмондон ўринбосари полковник С.Мамаюсупов томонидан ўз эгаларига топширилди.
Тақдирлаш маросимидан сўнг, байрам дастурхони атрофида касб байрамини нишонлаётган тиббиёт вакиллари учун Маънавият ва маърифат маркази ашула ва рақс ансамблининг хушовоз хонандалари томонидан дилтортар наволар ижро этилди.
