“Тўмарис издошлари-2023” танловида Миллий гвардия аёл ҳарбий хизматчилари ҳам муносиб иштирок этиб, фахрли 3-ўринни қўлга киритди
Бугунги кунда армиямиз сафларида нафақат йигитлар балки фидоий, садоқатли ва мард хотин-қизлар ҳам хизмат қилишмоқда. Ўтказилган мазкур танлов қизларнинг қанчалик мард ва жасоратли эканлигини кўрсатди. Шижоат, илдам ҳаракат ва муваффақият. Ғолиб бўлиш учун ҳар бир жамоада ана шундай иштиёқ кучли бўлди.
Чаққонлик, қатъиятлилик, зукколик, оқилалик ва моҳирлик. Бу фазилатларни ўзларида жам қилган жамоалар катта ишонч билан танловда жам бўлишди. Танловнинг расмий қисмида сўз олганлар соҳага қаратилаётган эътибор, аёл ходималарни ҳар томонлама қўллаб-қувватлаш, уларнинг ўрни ва ролини ошириш, истеъдодларини намоён қилишлари бўйича кенг кўламли ислоҳотлар амалга оширилаётганини ва яратилаётган шарт-шароитларни, давлатимиз суверенитети ва ҳудудий яхлитлиги, аҳолининг тинч ҳаёти ва хавфсизлигини ҳимоя қилиш йўлида фидокорона хизмат қилаётган ҳарбий хотин-қизларнинг меҳнатини алоҳида эътироф этишди.
Жамоани таништириш, пазандалик, ҳарбий-тиббий тайёргарлик, отиш тайёргарлиги, белгиланган масофага эстафета югуриш ҳамда эркин услубда 50 метр масофага сузиш машқи бўйича беллашган жамоаларнинг якуний натижалари бўйича мазкур танловда Мудофаа вазирлиги жамоаси фахрли 1-ўринни эгаллади. Ички ишлар вазирлиги вакиллари иккинчи ва Миллий гвардия жамоаси учинчи ўринга сазовор бўлди.
Таъкидлаш керакки, ходимларда юксак жанговар тайёргарликни ошириш, етакчилик хусусиятларини ривожлантириш, соғлом, маънавий-ахлоқий муҳитни шакллантиришдек мақсадларни кўзлаган ушбу кўрик-танлов қизғин ва муросасиз жараёнларга бой бўлгани билан эсда қолди.
Шарафли касбида соҳа ривожига муносиб ҳисса қўшиб келаётган танлов ғолиблари диплом, пул мукофоти ва эсдалик совғалар билан тақдирланди. Шунингдек, “Энг жонкуяр ҳарбий хизматчи хотин-қизлар жамоаси”, “Энг намунали ҳарбий хизматчи хотин-қизлар жамоаси”, “Энг фаол ва ташаббускор ҳарбий хизматчи хотин-қизлар жамоаси” номинациялари бўйича Давлат божхона қўмитаси, Давлат хавфсизлик хизмати Чегара қўшинлари ва Фавқулодда вазиятлар вазирлиги ҳарбий хизматчилари муносиб рағбатлантирилди.
Тадбир сўнгида Қуролли Кучлар ашула ва рақс ансамбли томонидан намойиш этилган концерт дастури мамлакатимиз осойишталиги ва дахлсизлигини таъминлашдек муҳим вазифани ўз зиммасига олган танлов иштирокчиларига байрамона кайфият бағишлади.
