ТРИАТЛОН: ҒАЛАБА МУБОРАК
Жорий йилнинг 3 июль куни Испаниянинг Канар ороллари минтақасида жойлашган Лансароте оролида ҳарбийлар ўртасида спортнинг триатлон тури бўйича “Ironman ” ХХII - Жаҳон чемпионати мусобақаси бўлиб ўтди.
Унда Осиё мамлакатлари орасида ягона иштирокчи сифатида қатнашган Ўзбекистон Республикаси ҳамда жаҳоннинг Германия, Россия, Франция, Бельгия каби жами 13 та давлатларидан 1000 нафарга яқин кучли тайёргарликка эга бўлган ҳарбий спортчилар иштирок этди.
Иштирокчилар Атлантика океанида 3800 метр масофага сузиш, 180 км тик ва ўрганилмаган ҳудудда велосипед ҳайдаш ва куннинг юқори намлик ҳамда жазирама иссиқ вақтида 42 км масофага югуриш баҳсларида ғолиблик учун ўзаро кураш олиб боришди.
Мусобақа натижаларига кўра, ушбу нуфузли чемпионатда юртимиз шарафини муносиб ҳимоя килган ҳамюртимиз, Ўзбекистон Республикаси Триатлон федерацияси аъзоси, Жамоат хавфсизлиги университети ходими Алина Хакимова аёллар ўртасида ўзининг шахсий биринчилиги бўйича фахрли 2-ўринни эгаллашга муваффақ бўлди.
Шу билан бирга, беллашувда Россия Федерацияси вакилалари Мария Гостева ўзининг юксак ва бой тажрибаси натижасида 1-ўринни, Светлана Ушакова эса 3-ўринни қўлга киритди.
Шунингдек, умумжамоа ҳисобида 1-ўрин Россия Федерацияси, 2-ўрин Ўзбекистон, 3-ўрин эса Бельгия жамоаларига насиб этди.
Таъкидлаш лозимки, спорт устаси, Миллий гвардия ҳарбий хизматчиси ушбу ғалабасини юксак маҳорат, юқори чидамлилиги натижасида табиатнинг оғир шароитларига қарамасдан ишончли харакати орқали қўлга киритди.
Спортчимизнинг эришган зафарлари билан муборакбод этиб, келгуси мусобақаларда ҳам ғалаба ва муваффақиятни қўлдан бермасдан, фақат улкан ютуқлар соҳибаси бўлишини тилаб қоламиз!
