Уч йил давомида Миллий гвардия томонидан 1168 нафар ҳарбий хизматчиларнинг оила аъзолари бандлигини таъминлашда яқиндан кўмак берилди.
Миллий гвардия ҳарбий хизматчиларининг оила аъзолари ишга жойлашиши, касб ўрганиши ва шахсий бизнесини ташкил этишига кўмаклашиш, шунингдек, хизмат турар жойи ва имтиёзли ипотека кредитлари билан таъминлаш, ҳар йили тиббий кўрикдан ўтишини ташкиллаштириш ва сифатли тиббий ёрдам кўрсатиш – уларни ижтимоий қўллаб-қувватлашда муҳим аҳамият касб этади.
Сўнгги уч йил ичида Миллий гвардия ҳарбий хизматчиларининг 1168 нафар оила аъзолари иш билан таъминланди. Масалан, уларнинг баъзилари мактабгача таълим ва таълим муассасаларида иш бошлаган бўлса, баъзилари хусусий секторда фаолият юритишни бошлади, айрмлари эса ҳарбий бўлим, бўлинмалар ва қисмларда хизматчи бўлиб ишламоқда.
Шу билан бир қаторда, касб-ҳунарни эгаллашга қарор қилган ҳарбий хизматчиларнинг турмуш ўртоқларига янги ҳунар эгаллашида амалий ёрдам берилди. Уч йил ичида 363 нафар аёллар моно-марказ ва касб-ҳунар таълими марказларига йўлланмани қўлга киритди. Ҳозирги кунда аёлларимизнинг аксарияти ўз мутахассислиги бўйича муваффақиятли фаолият юритмоқда.
Бундан ташқари, Миллий гвардия мутахассислари томонидан хотин-қизларга ҳуқуқий маслаҳатлар берилиб, бизнесни ривожлантириш учун банк кредитлари олишда, шунингдек, ҳокимият, ҳудудий давлат органлари билан ҳамкорликда корхона учун бинолар танлашда кўмаклашилди.
Бундай тадбирлар туфайли сўнгги уч йил ичида 26 нафар ҳарбий хизматчиларнинг турмуш ўртоқлари тадбиркорлик билан шуғулланиб, ўзини-ўзи иш билан банд қилган шахс мақомига эга бўлди.
Бугунги кунда ҳарбий хизматчилар ва уларнинг оила аъзоларини ижтимоий қўллаб-қувватлаш борасида ишлар жадал давом эттирилмоқда. Шу билан бирга, Миллий гвардия қўмондонлиги томонидан ҳудудий бошқармалар ва қўриқлаш бўлинмалари билан очиқ мулоқотларда билдирилган фикр ва таклифлардан келиб чиқиб, ижтимоий ҳимоя тадбирларини янада такомиллаштириш имкониятлари изланмоқда.
