Жиззах вилоятида сертификатланмаган дори воситаларининг айланмаси тўхтатиб қолинди
Жиззах вилоятида, Бош прокуратура ҳузуридаги Департамент, ИИБ ва Миллий гвардия ходимлари ҳамкорлигида олинган хабарга кўра тезкор тадбир ўтказилди ва унда сертификатланмаган дори воситаларини ноқонуний сотиш билан шуғулланиб келган шахслар аниқланди. Тадбир давомида уч нафар фуқаро А.С. ва А.Э ҳамда М.Х. лар тегишли ҳужжатларсиз 31 минг қути натрий хлорид препаратини 8 минг АҚШ доллари ва 37,4 миллион сўмга савдолашиш вақтида ашёвий далиллар билан қўлга олинди.
Мазкур ҳолат юзасидан Ўзбекистон Республикаси Жиноят Кодексининг 186-3-моддаси ("Сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш, шунингдек таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш") бўйича жиноят иши қўзғатилди. Ҳозирда тергов ишлари давом эттирилмоқда.
