Қўл жанги ва бокс бўйича Осиё чемпионларини тантанали тақдирлаш маросими бўлиб ўтди.
Маънавият ва маърифат маркази биносида Миллий гвардия қўмондонининг спортчилар билан учрашуви бўлиб ўтди. Ушбу тантанали тадбирда Қозон шаҳрида ўтказилган қўл жанги бўйича ҳамда Оммон(Иордания)да ўтказилган бокс бўйича Осиё чемпионатларида ғолибликни қўлга киритган спортчилар, терма жамоа мураббийлари, Қўл жанги федерациясияси мутасаддилари ҳамда халқаро тоифадаги ҳакамлар муносиб тақдирландилар.
Шу билан бир қаторда,"Янги Ўзбекистон" боғида Давлат байроғи қабул қилинганининг 31 йиллиги муносабати билан ўтказилган "Янги нафас" югуриш мусобақаси ғолиблари: Миллий гвардия ҳарбий хизматчилари Алина Ҳакимова ва Валентина Кибалниковалар ҳам рағбатлантирилди.
Мазкур тақдирлаш маросимида Ўзбекистон Республикаси Миллий гвардияси қўмондонлиги, Қўл жанги федерацияси вакиллари ҳамда "Ёш гвардиячилар" болалар ва ўсмирлар спорт мактаби ўқувчилари иштирок этди.
Тадбир аввалида, Миллий гвардия қўмондони-Ўзбекистон ҳуқуқни муҳофаза қилиш органларининг Қўл жанги федерацияси раиси Рустам Джураев спортчиларни ғалаба билан табриклаб, Осиё чемпионатида эришган юксак натижалари,матонати, ирода ва ғалабага бўлган иштиёқи учун миннатдорчилик билдирди ва келгуси мусобақаларда улкан муваффақиятлар тилади.
Шундан сўнг, Осиё чемпионатлари ва "Янги нафас" спорт мусобақаси ғолибларига II ва III даражали "Намунали хизматлари учун", "Фидойи ходими" кўкрак нишонлари, қўл соати ҳамда Миллий гвардия рамзи туширилган эсдалик совғалари ва пул мукофоти топширилди.
Алоҳида таъкидлаш жоизки, қўмондон томонидан ҳарбий хизматчи кичик сержант Норматова Гулжаҳонга жасорат ва матонат тимсоли бўлган алвон берет тантанали равишда топширилди.
Тадбир якунида барча иштирокчилар эсдалик учун жамоавий суратга тушдилар.
