Пойтахтимизда Ўзбекистон ҳуқуқни муҳофаза қилувчи органлар қўл жанги федерацияси терма жамоасининг спорт зали ўз эшикларини очди
Спорт залининг расмий очилиши Ўзбекистон ҳуқуқни муҳофаза қилувчи органлар қўл жанги федерациясининг 2023-йилда амалга оширилган ишлар якунлари ва 2024-йил учун режаларга бағишланган ҳисобот йиғилишига тўғри келди. Ўзбекистон ҳуқуқни муҳофаза қилувчи органлар қўл жанги федерацияси раиси, Миллий гвардия қўмондони генерал-маёр Р.Джураев раислигидаги йиғилишда федерациянинг ҳудудий бўлинмалар бошлиқлари ва уларнинг ўринбосарлари иштирок этди.
Спорт залининг тантанали очилиш маросими ва рамзий лентани кесишда ёшлар сиёсати ва спорт вазири ўринбосари Ш.Маҳмудов қатнашди. Шунингдек, маросимда клуб жойлашган Юнусобод тумани Қашқар маҳалласи фуқароларнинг ўзини ўзи бошқариш органлари вакиллари ҳамда маҳаллий аҳоли вакиллари меҳмон бўлишди. Албатта, аҳоли учун замонавий спорт зал кўринишига эга бўлган мазкур бино фарзандларини спортга жалб этиш учун ажойиб имконият бўлди.
Қўл жанги федерацияси раисининг тантанали маросим иштирокчиларига сўзлаган нутқида таъкидлаганидек, сўнгги йилларда давлатимиз раҳбарининг ушбу спорт турини ривожлантиришга қаратаётган эътибори туфайли Ўзбекистонда қўл жанги “иккинчи” нафасга эга бўлди. Давлатимиз раҳбарининг 2022-йил 20-июндаги “Қўл жанги спорт турини янада ривожлантириш чора-тадбирлари тўғрисида”ги қарори мазкур спортни ривожлантиришга кучли туртки бўлди. Ёшларнинг қўл жанги билан шуғулланиши учун федерациянинг моддий-техник базаси ва инфратузилмаси доимий равишда такомиллаштирилмоқда. Курашчилар ва мураббийларнинг ҳар томонлама қўллаб-қувватланиши спортчиларни нуфузли давлат ва халқаро миқёсидаги мусобақаларда тобора кўпроқ ғалабаларга эришишларига чорламоқда. Анъанавий спорт турларига қараганда, қўл жангини афзал кўраётган ўғил-қизлар сони кун сайин ортиб бормоқда. Шундай қилиб, “Бугунги кунда 29 мингдан ортиқ йигит-қизлар қўл жанги билан мунтазам шуғулланади, бу уч-тўрт йил аввалгига нисбатан 67 фоизга кўпдир. Шу билан бирга, мамлакатимизда қўл жанги секциялари сони 4 баробарга – 210 тадан 874 тага кўпайди. Сўнгги пайтларда қўл жанги бўйича 230 нафар Ўзбекистон спорт устаси, 60 нафар халқаро тоифадаги спорт устаси тайёрланди, — дейди Р.Джураев.
Ўзбекистон ҳуқуқни муҳофаза қилувчи органлар қўл жанги федерацияси раисининг ўринбосари, Халқаро қўл жанги федерациясининг биринчи вице-президенти Б.Мирзақулов ўз нутқида сўнгги йилларда Ўзбекистон қўл жанги жамоаси бир неча бор халқаро ва республика мусобақаларида ғолиб бўлганларини таъкидлади. Шу тариқа, 2021 ва 2022 йилларда терма жамоамиз аъзолари катталар ва ёшлар ўртасидаги жаҳон чемпионатларининг мутлақ ғолибига айланди. 2023 йил, айниқса, спортчиларимиз учун энг юқори даражадаги медаллар бўйича самарали йил бўлди. Остона шаҳрида (Қозоғистон) ўтказилган қўл жанги бўйича жаҳон чемпионатида Ўзбекистон терма жамоаси 7 та олтин, 6 та кумуш ва 12 та бронза медалини қўлга киритиб, фахрли 3-ўринни эгаллади. Беларус пойтахти Минск шаҳрида ўтказилган жаҳон чемпионатида спортчиларимиз умумжамоа ҳисобида биринчи ўринни эгаллади. Москва шаҳрида қўл жанги бўйича ўтказилган жаҳон чемпионатида икки нафар ҳамюртимиз энг юқори стандартдаги медал ва ғолиблик камарига, яна икки нафари эса кумуш медалларига сазовор бўлди. Ғалабалар рўйхатини давом эттириш мумкин, аммо қайд этилган фактларга кўра спортчиларимиз қўлга киритган муваффақиятлар учун қанча куч ва меҳнат сарфлагани аён бўлмоқда.
Шубҳасиз, жамоамизни олдинда янада кўпроқ ютуқ ва ғалабалар кутмоқда. Қолаверса, яқинда чинакам тарихий воқеа рўй берди: ўтган йилнинг декабрь ойида Осиё қўл жанги федерацияси ташкил топди. Жорий йилнинг феврал ойида эса Тошкентда 16 мамлакатнинг қўл жанги федерациялари вакиллари иштирокида биринчи Конгресс бўлиб ўтди.
Осиё қўл жанги федерациясининг ташкил этилиши спортчиларни илҳомлантирди, чунки бу, мазкур спортни Осиё ўйинлари ва Осиё ўсмирлар ўйинлари дастурига киритиш истиқболини очди ва шу тариқа, спортчиларга 2025-йилда бўлиб ўтадиган IV ёзги ўсмирлар Осиё ўйинларида иштирок этиш имконияти берди.
Шу кунларда спорт залида 40 нафар спортчидан иборат қўл жанги бўйича Ўзбекистон терма жамоаси 26-28 апрель кунлари бўлиб ўтадиган Ўзбекистон чемпионатига қизғин тайёргарлик кўрмоқда. Спортчилар клубда сифатли машғулотлар ўтказиш учун яратилган шарт-шароитларни юқори баҳолади.
Янги залга киришда меҳмонлар эътиборига жаҳон ва Ўзбекистон чемпионлари суратлари туширилган стендлар, давлат ва жаҳон миқёсидаги энг нуфузли мусобақаларда спортчилар томонидан қўлга киритилган кубок ва медаллар намойиш этилган.
Бино спорт билан шуғулланиш учун зарур бўлган барча нарсаларга эга:душ ва ечиниш хоналари, индивидуал шкафлар, тренажёр ва универсал спорт заллари мавжуд. Нега универсал? Чунки умумий майдони деярли уч юз квадрат метр бўлган ушбу залда бир вақтнинг ўзида 40-50 тагача спортчи ҳар хил спорт турлари билан шуғулланиши мумкин. Ўн хил турдаги тренажёрларда эса ҳар ким ўз кардио тизимини машқ қилиши ёки бўлмаса мушакларни машқ қилиши мумкин. Матларда эса - қўл жанги билан шуғулланади.
Ҳар куни нафақат маҳалладаги уйлардан, яқин атрофдаги маҳаллалардан ҳам кўплаб ўғил-қизлар машғулот ўтказиш учун спорт залга келишади. Қўл жанги усталари ўғил-қизларнинг қувноқ юзлари ва спорт билан шуғулланаётган матонатини кузатар экан, ғурур билан: “Ажойиб ёш жамоа, замонавий болаларнинг чемпион бўлишлари учун барча шароит ва имкониятлар яратилгани яхши”, — дейдилар.
