Миллий гвардия тизимидаги аёл ҳарбий хизматчи ва ходимлар, шунингдек, курсантлар ўртасида ўтказилган "Матонат маликалари" кўрик танловининг республика босқичи якунланди ва ғолиблар "8 март- Ҳалқаро хотин қизлар куни" байрамида муносиб рағбатлантирилди.
Баҳорнинг илк байрами 8 март-Халқаро хотин-қизлар куни муносабати билан Миллий гвардия тизимида хизмат қилиб келаётган аёл ҳарбий хизматчи ва ходимлар, шунингдек, курсантлар ўртасида "Матонат маликалари" кўрик-танловининг Республика босқичи ўтказилди. Мазкур танловнинг ҳудудий босқичида ғолибликни кўлга киритган 16 нафар қизлар "Матонат маликаси" шарафи учун куч синашдилар.
Беллашув жараёнлари ҳакамлар ҳайъати аъзолари томонидан кузатиб борилиб, иштирокчилар саф ҳамда ўқ отиш тайёргарлиги, от спорти, камондан отиш шартлари бўйича ўз имкониятларини синовдан ўтказишди.
Танловнинг иккинчи босқичи ўзгачалиги билан эсда қоларли бўлди. Ҳарбий қизларимиз бу сафар "Миллий либослар кўргазмаси" "Мафтункор аёл" "Матонат маликалари.Миллатнинг фидойи хотин-қизлари номинацияси" бўйича синовдан ўтказилди. 4- Шарт мобайнида қизлар миллий либосларини тақдим этиб, бош кийимларидаги ихчамлилик,ранглар жилоси, аксессуарлар ва турли тақинчоқларини уйғунлаштириш бўйича ўзларининг юксак дид эгалари эканлигини намойиш этишди.
Жозибадор ва баҳорий соч турмагини яратиш, шунингдек, давлат арбоблари, ўзбек миллатининг тарихи ва келажагида чуқур из қолдирган, миллатнинг фидойи хотин-қизларининг ҳаёти ва ижоди тўғрисида маълумот бериш шартларидаги ижодий ёндашувлар ҳакамлар ҳайъати аъзолари томонидан юқори баҳоланди.
Якуний натижаларга кўра 3-ўринни Андижон вилояти бошқармаси шарафини ҳимоя қилган Ф. Ҳакимжонова эгаллаган бўлса, 2-ўрин Наманган вилояти бошқармаси ҳарбий хизматчиси Г.Суропова насиб этди, фахрли 1-ўринни Сурхондарё вилояти бошқармаси вакиласи С. Нурбоева қўлга киритди.
Ғолиб ва совриндорлар тақдирлаш маросимида муносиб тақдирланди.
