Пойтахтимизда муомалага чиқарилиши тақиқланган кучли таъсир этувчи дори воситалари савдосининг олди олинди.
Жорий йилнинг 7 апрель куни Ўзбекистон Республикаси ИИВ, ДХХ ва Миллий гвардия ҳамкорлигида пойтахтимизнинг Учтепа туманида тезкор-қидирув тадбирлари ўтказилди.
Тезкор тадбир давомида фуқаролар 20 ёшли зангиоталик Т.Ш ва 26 ёшли И.Д. “Ўрикзор” савдо мажмуасида 1 600 АҚШ доллари эвазига таркибида “Сибутрамин” моддаси бўлган турли хил савдо белгиси остида ишлаб чиқилган жами 1 200 дона кучли таъсир қилувчи дори воситаларини сотаётган вақтида қўлга олинди.
Шунингдек, бозор ҳудудидаги уларга тегишли омборхонадан 11 282 дона вазн йўқотиш учун қўлланиладиган кучли таъсир қилувчи дори воситалари ашёвий далил сифатида расмийлаштирилди.
Ҳурматли юртдошлар! «Tito Lido», «Горячий перец», «Цинзи шоу», «Блокатор», «Редуксин лайт», «Black panther», «Fatzorb» каби фаол реклама қилинган вазн йўқотиш учун қўлланиладиган дори-дармонлар соғлиғингизга жиддий зарар етказиши мумкин. Мазкур дорилар кучли ва ҳатто психотроп ҳамда гиёҳванд моддаларни ўз ичига олади. Шунингдек, дорилар тиббий синовдан ўтказилмаган ва қай даражада таъсир қилишига ҳеч ким кафолат бермайди
