“Ватан меҳри юрагимда” шиори остида “Тўмарис издошлари - 2022” Республика танловида Миллий гвардия аёл ҳарбий хизматчилари фахрли 2 ўринни қўлга киритди.
Жорий йилнинг 8-9 ноябрь кунлари Марказий ҳарбий округ “Фориш” дала ўқув майдонида Ўзбекистон Республикаси куч тузилмаларида фаолият юритаётган ҳарбий хотин-қизлар ўртасида “Ватан меҳри юрагимда” шиори остида “Тўмарис издошлари – 2022” номли республика танлови бўлиб ўтди.
Мазкур танловда Ўзбекистон Республикаси Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардия ҳамда Давлат божхона қўмитаси вакиллари муносиб иштирок этиб, улар томонидан ғалаба учун муросасиз беллашув олиб борилди.
Иштирокчилар 6 та шарт, яъни Тўмарис сиймосини гавдалантирган ҳолда ўзларини таништириш, ўқ отиш, ярадорларни жанг майдонидан олиб чиқиш, югуриш, сузиш ва дала шароитида мазали таом тайёрлаш шартлари бўйича ўзаро беллашдилар.
Шуни алоҳида таъкидлаб ўтиш жоизки, ўқ отиш ҳамда сузиш йўналишлари бўйича ҳарбий хизматчилар З.Тешабоева ва М.Ибрагимовалар энг юқори натижаларни кўрсатиб, рекордни янгилади.
Шунингдек, танлов давомида қизлар мардлик, жасурлик ва зукколик каби фазилатларини намойиш этиб, ҳайъат аъзоларининг эътирофига сазовор бўлди.
“Тўмарис издошлари - 2022” Республика танлови қизларнинг ғалабага бўлган интилиши, юқори жанговар-ахлоқий руҳияти ва юксак ватанпарварлик туйғусини шакллантириш, қўшинларда соғлом рақобат ва ўзаро мусобақа муҳитини яратиш, ҳарбий хизматчи аёлларнинг хизмат нуфузини, Ватанга ва ўз касбига бўлган меҳр ва садоқат ҳиссини ҳамда армиянинг профессионал тайёргарлигини янада оширишига кенг замин яратди.
Якуний натижаларга кўра 3-ўринни Ички ишлар вазирлиги, 2-ўринни Миллий гвардия жамоаси қўлга киритди. Биринчи ўрин Мудофаа вазирлигига насиб этди.
Ғолиблар диплом ва пул мукофотлари билан тақдирланди.
