Ватан ҳимоячилари ва уларнинг оила аъзоларини ижтимоий қўллаб-қувватлаш Миллий армиямизни ривожлантиришнинг устувор йўналишларидан биридир.
Юртбошимиз томонидан барча соҳаларда амалга оширилаётган кенг ислоҳотлар қатори соғлиқни сақлаш тизимини ривожлантириш ҳамда тиббиёт муассасаларини моддий-техник базасини мустаҳкамлашга доир белгилаб берилган устувор вазифаларнинг амалий ижроси Миллий гвардия тизимида ҳам таъминланиб келинмоқда.
Хусусан, тизимдаги шахсий таркиб ва уларнинг оила аъзолари ҳамда соҳа фахрийларига бирламчи тиббий ёрдам кўрсатиш, даволаш-профилактика ишларини ташкил этиш, касалликларнинг олдини олиш ва даволаш ишларини олиб бориш мақсадида, 2021 йилнинг январ ойида Миллий гвардия поликлиникаси фаолияти йўлга қўйилди.
Бугунги кунда Поликлиникада инновацион технологиялар ва замонавий тиббий хизматлар йўлга қўйилган бўлиб, барча тор доирадаги мутахассис шифокорлар, яъни терапевт, жарроҳ, невролог, ЛОР (отоларинголог), стоматолог, офталмолог ва дерматолог шифокорлар билан жамланган ҳамда барча шифокорлар замонавий клиник-диагностик тиббий ускуналар билан таъминланган.
Шунингдек, поликлиникада беморларга тўғри ва аниқ ташхис қўйиш ҳамда зарур бўлган бирламчи текширувларни ўтказиш учун, бир неча турдаги замонавий лаборатор таҳлиллар, шунингдек, замон талабларига мос ПЦР диагностикаси, рентген, ултратовуш, ЭКГ, ЭНМГ ва ЭГДФС ускуналари билан жиҳозланган.
Куни кеча Миллий гвардия қўмондони генерал-майор Р.Джураев ушбу муассасага ташриф буюриб, ўтган давр мобайнида амалга оширилган ишлар билан танишди. Шунингдек, шифокорлар билан яқиндан суҳбатлашган ҳолда уларнинг фикр мулоҳазалари тингланди ҳамда мутасадди раҳбарларнинг мазкур йўналишдаги чора-тадбирларни такомиллаштиришга оид тақдимоти билан танишилиб, истиқболли режалар ва моддий базани мустаҳкамлашга доир қўшимча топшириқлар берилди.
Шунингдек, тиббий хизмат сифатига мутлақо янгича ёндашувлар асосида қараш зарурлиги, гвардиячилар ва уларнинг оила аъзолари саломатлигини доимий таъминлаш эса, уларнинг жанговар қобилиятини мустаҳкамлаш учун муҳим ва асосий омил ҳисобланиши таъкидланди.
