Ватанпарвар ёшлар мусобақаси ўтказилди
Миллий гвардия Тошкент “Темурбеклар мактаби” ҳарбий-академик лицейи, Ички ишлар вазирлигининг 2-сонли академик лицейи ва “Olimp-lider” махсус синфлари ўқувчилари ўртасида ҳарбий-спорт мусобақаси бўлиб ўтди.
Мусобақанинг асосий мақсади — ёшларни ҳарбий спорт турларига қизиқтириш, жисмоний тайёргарликни ривожлантириш ва халқаро мусобақаларда Ўзбекистон шарафини ҳимоя қиладиган иқтидорли ҳарбий спортчиларни тайёрлашдан иборат. Шунингдек, тадбир орқали ёшлар орасида соғлом рақобат муҳити ва ватанпарварлик руҳи тарғиб қилинди.
Ҳар бир жамоадан 25 нафар иштирокчи турли ҳарбий-спорт машқларида беллашди. Пневматик милтиқдан ва камондан отиш бўйича қизлар алоҳида иштирок этиб, аниқлик ва диққатни намоён қилди.
Ҳарбийлашган кўпкураш эстафетаси эса нафақат жисмоний тайёргарликни, балки тезкорлик ва жамоавий ҳамкорликни ҳам синади. Иштирокчилар газ ниқобида югуриш, АК-74 автоматини нотўлиқ қисмларга ажратиш ва йиғиш, турникда тортилиш ҳамда 12 килограмм юк билан югуриш каби машқларни муваффақиятли бажаришди. Қўл жанги намойишларида эса иштирокчилар техника ва жисмоний қудратнинг уйғунлигини намоён этишди.
Умумжамоа ҳисобида энг юқори натижага эришган ва биринчи ўринни қўлга киритган жамоа — Темурбеклар мактаби бўлди. Мусобақа иштирокчиларига дипломлар ва эсдалик совғалари топширилди.
Таъкидлаш жоизки, мусобақа нафақат ёшларни спортга қизиқтириш ва жисмоний ривожлантириш, балки уларни ватанпарварлик руҳида тарбиялаш ва келажакда ҳарбий хизматда муносиб фаолият юритишга илҳом берувчи муҳим тадбир сифатида ўтди.
