ВАТАНПАРВАР ЁШЛАР – МИЛЛАТ ТАЯНЧИ!
Ёшларни турли ёт ғоялар таъсирига тушиб қолмаслигининг олдини олиш, бўш вақтларини мазмунли ташкил этиш, уларни миллий қадриятларимиз, анъаналаримизга ҳурмат руҳида тарбиялаш мақсадида, Миллий гвардия Сурхондарё вилояти бўйича бошқармаси ҳарбий хизматчилари томонидан мунтазам равишда маънавий-маърифий, маданий тадбирлар ва учрашувлар ўтказилиб келинмоқда. Бунда айниқса, уюшмаган ёшларни кенг жалб этиш орқали, уларда ватанпарварлик туйғусини шакллантириш, муаммоларини ўрганиш, бандлигини таъминлашга алоҳида эътибор қаратилмоқда. Куни кеча Термиз шаҳрида ана шундай жиҳатларни қамраб олган навбатдаги тадбирларнинг бири бўлиб ўтди. Термиз шаҳридаги “Шодлик” МФЙда истиқомат қилувчи уюшмаган ёшлар ҳамда Миллий гвардияга бириктирилган Олтинсой туманидаги 2-сонли айрим фанларга ихтисослаштирилган мактабнинг “Ватанпарварлик синфи” ўқувчилари учун Термиз шаҳрининг диққатга сазовор жойлари, тарихий обидаларига саёҳат уюштирилди.
Саёҳат давомида ёшлар, Ал-Ҳаким ат-Термизий мажмуаси, Хотира хиёбони ҳамда тарих ва маданият музейига ташриф буюриб, буюк аждодларимиз, сурхон воҳасининг тарихи, маданияти ва урф-одатлари, табиати ва ҳайвонот дунёси ҳақида батафсил маълумотларга эга бўлдилар.
Ташкил этилган тадбир, иштирокчиларга унутилмас воқеликларга бой бўлганлиги билан аҳамиятли бўлди. Бундай саёҳатларнинг давомийлиги ёшларни маънавияти ва тафаккурини бойитиб, уларни ватан равнақини янада тараққий топиш йўлида мард ўғлонлар бўлиб етишига хизмат қилади.
