Юртбошимиз ташаббуси билан барпо этилган “Темурбеклар мактаби”да ўтказилган тантанали маросимда Ўзбекистон Республикаси Миллий гвардияси қўмондони, генерал-майор Р.Джураев, Ўзбекистон Республикаси Олий Мажлис Қонунчилик палатаси Мудофаа ва хавфсизлик масалалари қўмитаси аъзолари, Тошкент шаҳар Миробод тумани ҳокими А.Салайдинов, Ўзбекистон Республикаси Фахрийлар кенгаши аъзолари ва бошқа мутасадди раҳбарлар ҳамда битирувчиларнинг оила аъзолари иштирок этди.
Тадбирда Миллий гвардия қўмондони, генерал-майор Р. Джураев сўзга чиқиб, ўтган қисқа давр ичида Миллий гвардия тизимидаги узлуксиз таълимни ривожлантириш, олий ва ўрта махсус таълим сифатини янада яхшилаш борасида кенг қамровли ишлар амалга оширилганлиги, бунинг амалий натижасини “Темурбеклар мактаби” мисолида ҳам кўриш мумкинлигини алоҳида таъкидлади.
Шунингдек, муассаса ўқитувчилар томонидан ўқитишнинг янги тизими жорий этилиши, машғулотларнинг замонавий педагогик технологиялардан унумли фойдаланган ҳолда ташкил этилиши ўқувчиларнинг ижобий натижаларни қўлга киритишига асосий омил бўлиб хизмат қилаётганини эътироф этди.
Дарҳақиқат, “Темурбеклар мактаби” битирувчилари олий таълим муассасаларига кириш кўрсаткичи бўйича охирги йилларда 93 фоизни ташкил этиб, республикамиздаги барча ҳарбий академик лицейлари орасида биринчи ўринни эгаллаб келмоқдалар. Республика миқёсида ўтакзиладиган фан олимпиадаларида ҳам биринчиликни қўлга киритмоқдалар. Шу жумладан, инглиз тилини билиш даражаси бўйича турли халқаро сертификатларни ҳам қўлга киритмоқдалар.
Далатимиз раҳбари қарорига асосан, Миллий гвардия Республика ихтисослаштирилган мусиқа академик лицейи негизида Миллий гвардия Ҳарбий мусиқа академик лицейи ташкил этилди ва муассасада туб ислоҳотлар амалга оширилди. Бугун “Темурбеклар мактаби” ўқувчилари билан бир қаторда Ҳарбий мусиқа академик лицейининг биринчи битирувчилари ҳам шижоат билан сафда турибди.
Ҳарбий мусиқа академик лицейининг биринчи қалдирғочлари кўрсатгичлари ҳам юқори. Ушбу муассаса ўқувчилари охирги йилларда нафақат Ўзбекистонда балки Халқаро нуфузли танлов ва фестивалларда иштирок этиб, ғолибликни қўлга киритиб келмоқдалар.
Хусусан, Италия, Россия, Озарбайжон, Қозоғистон давлатларида бўлиб ўтган нуфузли танловларда лицей ўқувчилари биринчи ва фаҳрли ўринларни эгаллаган.
Маросимга ташриф буюрган меҳмонлар ва ота-оналар битирувчиларнинг келажакда буюк саркарда Амир Темур вориси номига муносиб, малакали мутахассис сифатида шаклланиб, Янги Ўзбекистоннинг мустаҳкам қанотларига айланишларига тилак билдирдилар.
Шундан сўнг, “Темурбеклар мактаби”нинг 110 нафар битирувчиларига, шундан, 28 нафар ўғлонга имтиёзли диплом ва “Аълочи ўқувчи” кўкрак нишони топширилган бўлса, Ҳарбий мусиқа академик лицейининг 21 нафар битирувчисига диплом ва кўкрак нишонлари топширилди. “Темурбеклар мактаби” битирувчилари орасида Тошкент шаҳридаги 22-сонли “Меҳрибонлик” уйининг тўрт нафар собиқ тарбияланувчилари ҳам борлиги барча учун қувонарли бўлди.
Маросимга ташриф буюрганлар тадбирнинг бадиий қисмида Ҳарбий мусиқа академик лицейи ўқувчилари “Зарбли чолғулар ансамбли” дефиле чиқишлари ҳамда “Темурбеклар мактаби” ўқувчиларининг қўл жанги кўргазмали чиқишларидан баҳраманд бўлдилар.