ХАЛҚ ВА АРМИЯ — БИР ТАНУ БИР ЖОН
Ёшлар ҳақида гап кетганда ҳамманинг кўз олдида юртимиз эрталари, мамлакатимиз келажаги гавдаланади. Эртанги куннинг қандай бўлиши, бугун қандай тайёргарлик кўрилганига боғлиқ. Ёшлар учун ҳарбийларнинг тартиб-интизоми ва қатъий ўрнатилган қонун-қоидалари, ҳарбий техникаларнинг тактик-техник сифатлари, армияда мавжуд замонавий ўқотар қуроллар ва учиш аппаратлари ўзгача таассурот уйғотувчи мотивдир.
Ёшларни ҳарбий ватанпарварлик руҳида тарбиялаш мақсадида барча куч тузилмалари бир ёқадан бош чиқариб ҳаракат қилмоқда. Хусусан, Ўзбекистон Республикаси Қуролли кучлари ташкил этилганлигининг 30 йиллиги муносабати ҳамда " Ўзбекистон ёшлар форуми-2021" доирасида Сирдарё вилояти бўйича Миллий гвардия бошқармаси, Қўриқлаш бошқармаси, Ўзбекистон ёшлар иттифоқи Сирдарё вилояти кенгаши, вилоят Ички ишлар бошқармаси, вилоят Мудофаа ишлари бошқармаси, Гулистон ҳарбий прокуратураси, Мудофаага кўмаклашувчи Ватанпарвар ташкилоти ҳамда вилоят Фавқулодда вазиятлар бошқармаси билан ҳамкорликда ўқувчи ёшларни ҳарбий ватанпарварлик руҳида тарбиялаш, уларнинг бўш вақтларини мазмунли ўтказиш мақсадида Гулистон шаҳар 15-умумтаълим мактабида "Халқ ва армия- бир тану бир жон" шиори остида ватанпарварлик тадбири ўтказилди.
Тадбир давомида ҳарбий хизматчилар томонидан замонавий зирҳли техникалар, ҳарбий қурол-аслаҳалар ва ҳимоя воситаларини ишлатиш тартибини, техник хусусиятлари, камондан ўқ отиш ҳамда от спорти бўйича маҳорат сабоқлари ўтилиб, ўқувчи ёшларга кўргазмали чиқишлар намойиш этилди.
