ХАЛҚАРО ҲАМКОРЛИКНИНГ ИСТИҚБОЛЛАРИ
Жорий йилнинг 22 февраль куни Миллий гвардия Халқаро ҳамкорлик бошқармасида Италия билан икки томонлама ҳамкорликни ўрнатиш ва ривожлантириш мақсадида Италиянинг Ўзбекистондаги элчихонаси хавфсизлик бўйича мутахассиси подполковник Федерико Куатрини билан учрашув ўтказилди.
Тадбирда Ўзбекистон Республикаси Миллий гвардиясининг таркибий бўлинмалари мутасадди раҳбарлари ва вакиллари иштирок этдилар.
Учрашув давомида меҳмонлар Италия Карабинерлар қўшинлари фаолиятига бағишланган тақдимот ўтказди.
Карабинерлар тарихи икки юз йиллик даврни ўз ичига қамраб олган бўлиб, 1871 йилда Италия бирлашган вақтда ҳарбий қисмларнинг қўшилишидан бошланади. Ҳозирда ушбу корпус Италия Қуролли Кучларининг таркибий қисмларидан бири бўлиб, жамоат тартибини сақлаш ва ҳарбий полиция вазифасини бажаради.
Тақдимот доирасида бўлинмаларнинг функция ва вазифалари, фаолият йўналишлари, кадрлар тайёрлаш тизими, шунингдек амалга оширилаётган халқаро ҳамкорлик алоқалари батафсил ёритиб берилди.
Шу билан бирга Ўзбекистон Республикаси Миллий гвардияси ва Италия Карабинерлар қўшинлари ўртасида икки томонлама ҳамкорликни ўрнатиш ва ривожлантириш истиқболларини муҳокама қилинди.
Учрашув якуни бўйича томонлар икки томонлама ҳамкорлик салоҳиятини ривожлантириш ва ҳамкорлик доирасини янада кенгайтиришга келишиб олдилар.
