Яккасарой туманида қидирувда бўлган сурхондарёлик фуқаро қўлга олинди.
Жорий йилнинг 27 март куни соат 22:23 да Яккасарой тумани “Қўриқлаш” бўлимига мазкур туманда жойлашган “Korzinka Rakat” супермаркетига ташриф буюрган фуқаро Ўзбекистон Республикаси ИИВ томонидан қидирув эълон қилинган шахсга ўхшашлиги тўғрисида хабар келиб тушган.
Ходимлар юқорида кўрсатилган манзилга зудлик билан етиб борган ва кўрилган тезкор чора-тадбирлар натижасида ушбу шахс қўлга олинган. Шундан сўнг, Яккасарой тумани ИИО навбатчилик қисмига ўрнатилган тартибда топширилган.
Дастлабки тезкор суриштирув натижасида ушбу шахс Бойсун тумани ИИБ томонидан 2018 йил сентябрь ойидан Ўзбекистон Республикаси ЖКнинг 122-моддаси (Вояга етмаган ёки меҳнатга лаёқатсиз шахсларни моддий таъминлашдан бўйин товлаш) билан айбланиб, қидирувда бўлган 41 ёшли фуқаро И.И эканлиги аниқланган.
Мазкур ҳолат бўйича суриштирув ишлари Яккасарой туман ИИБ томонидан олиб борилмоқда.
