ЯНГИ БИНОЛАР – ЯНГИ МАРРАЛАР САРИ
Шу кунларда энг улуғ ва энг азиз байрам – жонажон Ватанимиз мустақиллигининг ўттиз йиллигини муносиб кутиб олиш мақсадида бутун мамлакатимиз бўйлаб катта бунёдкорлик ва ободонлаштириш ишлари амалга оширилмоқда.
Ўзбекистон Республикаси Миллий гвардияси Тошкент шаҳри бўйича бошқармасида қад ростлаган янги замонавий бинолар ушбу кенг кўламли ишларнинг узвий давоми бўлди.
Байрам арафасида қуриб битказилган мазкур бинолар Миллий гвардия қўмондони, генерал-майор Р.Джураев бошчилигида тантанали равишда фойдаланишга топширилди.
Тантанали маросимда Тошкент шаҳар прокурори У.Қосимов, пойтахт ИИББ бошлиғи, генерал-майор А.Ташпулатов, шаҳар Фавқулодда вазиятлар бошқармаси бошлиғи, генерал-майор Р.Хайдаров, Бектемир тумани ҳокими Т.Махамадзияев ва бошқа бир қатор мутасадди ташкилотлар вакиллари иштирок этди.
Давлат мадҳияси янграганидан сўнг, қўмондон ҳамда тегишли вазирлик ва идоралар раҳбарлари сўзга чиқиб, яратилаётган бундай шарт-шароит ва қулайликларнинг барчаси шахсий таркибни ўз хизмат мажбурияларини пухта ва сифатли бажаришига ундаши ҳамда фаолият самарадорлигини таъминлашга хизмат қилишини таъкидладилар.
Байрамона руҳда ўтган тадбирда Миллий гвардия қўмондонининг буйруғига кўра, хизмат фаолияти давомида юқори натижаларга эришган, фидоийлиги ва жонкуярлиги билан сафдошларига намуна бўлиб келаётган бир гуруҳ ҳарбий хизматчиларга “Намунали хизматлари учун” кўкрак нишони, фахрий ёрлиқ ҳамда ҳарбий унвонлар тантанали равишда топширилди ва барча синовлардан муваффақиятли ўтган бир қатор ҳарбий хизматчиларга “Алвон берет” кийиш ҳуқуқи берилди.
Тақдирлашдан сўнг, ташриф буюрган меҳмонлар янги биноларда яратилган шарт-шароит ва қулайликлар билан танишди. Хусусан, шинам ва замонавий услубда қурилган ўқув биноси, ўқ отиш машғулотларини ўтказилиши учун махсус жиҳозланган хона, футбол майдони ҳамда зарур спорт анжомлари билан жиҳозланган спорт ва фитнес заллари ҳамда ётоқхоналар тадбир иштирокчиларига жуда манзур бўлди.
Ўйлаймизки, барча қулайликларга эга бўлган бундай бинолар ҳарбий хизматчиларнинг халқни рози қилиш ҳамда уларнинг манфаатларини ҳимоя қилиш йўлидаги фаолиятини самарали ташкил этишда муҳим қадамлардан биридир.
