“Янги Ўзбекистонда эл азиз, инсон азиз” шиори остида куч тузилмалари, ҳуқуқни муҳофаза қилувчи органлар кавалерия бўлинмалари, чавандозлар мактаблари, Йилқичилик ва от спорти федерацияси спортчилари иштирокида “Отлиқ кавалерия паради” бўлиб ўтди.
Пойтахтимизда Мустақиллигимизнинг 31 йиллиги байрами муносабати билан “Янги Ўзбекистонда эл азиз, инсон азиз” шиори остида куч тузилмалари, ҳуқуқни муҳофаза қилувчи органлар кавалерия бўлинмалари, чавандозлар мактаблари, Йилқичилик ва от спорти федерацияси спортчилари иштирокида “Отлиқ кавалерия паради” бўлиб ўтди.
Тадбирда қорабайир, белорус, рус, инглиз, немис сингари от зотларига мансуб 100дан ортиқ от иштирок этди.
Жамоат хавфсизлиги университети ҳарбий оркестри ижросидаги мусиқа садолари остида чавандозлар хизмат ва спорт кийимларида, Ўзбекистон байроғини баланд кўтарган ҳолда хиёбон айланаси бўйлаб юриб ўтди.
Тантанали тадбирни томоша қилишга ташриф буюрган 5 мингга яқин пойтахтимиз аҳолиси ва меҳмонларига Отлиқ кавалерия бўлинмалари ҳаракатларининг жозибадорлиги жуда ҳам манзур бўлди. Айниқса ёшларга ушбу очиқ осмон остидаги байрамона тадбир бир олам қувонч бағишлади.
