"Янги Ўзбекистоннинг тараққиётида ёшларни ҳарбий ватанпарварлиги йўлида, янгича раҳбарлик маҳорати ва жасорати" мавзусида семинар-тренинг ўтказилди.
Тадбир Миллий гвардия ҳамда Республика Маънавият ва маърифат маркази ҳамкорлигида, мутахассис психолог офицерлар иштирокида ташкил этилди.
Семинарни Республика Маънавият ва маърифат маркази, “Маърифат” тарғиботчилар жамияти аъзоси ва эксперти, халқаро тоифадаги спикер, фалсафа фанлари доктори, профессор, ижтимоий психолог, Тошкент шаҳар кенгаши депутати, Ўзбекистонда хизмат кўрсатган Ёшлар муррабийси Жамила Шермуҳамедова ўтказди.
Ж.Шермуҳамедова ўз маърузасида ёшлар онгида фидойилик, масъулият, ташаббускорлик, шижоат ва лидерлик сифатларини шакллантиришнинг замонавий усуллари ҳақида атрофлича фикр юритди. Шунингдек, ўз-ўзини бошқариш, стрессни енгиш, жамоада самарали мулоқот ва ўзаро ишонч муҳитини яратиш бўйича амалий тавсиялар берди. Тренинг жараёнида интерфаол машғулотлар, реал ҳаётий вазиятлар асосида таҳлиллар ва жамоавий муҳокамалар ўтказилди.
Мазкур семинар-тренинг гвардиячиларнинг касбий маҳоратини ошириш, психологик тайёргарлигини мустаҳкамлаш ҳамда жамоада мулоқот ва ҳамкорлик маданиятини янада юксалтиришга хизмат қилмоқда.
