“Ёш гвардиячи” ҳарбий-спорт мусобақаси ғолиблари аниқланди
Ўқувчи ёшларни ватанга муҳаббат, ҳарбий бурчга садоқат руҳида тарбиялаш, улар орасида соғлом турмуш тарзини тарғиб қилиш, миллий гвардия тизимида хизмат қилишга қизиқтириш ва босқичма-босқич тайёрлаб бориш мақсадида Сирдарё вилоятида Ўзбекистон Республикаси Миллий гвардияси, Халқ таълими вазирлиги ва Ёшлар иттифоқи Марказий кенгаши ҳамкорлигида “Ёш гвардиячи” ҳарбий-спорт мусобақасининг республика босқичи ўтказилди.
Мусобақада Миллий гвардияга бириктирилган 56 та умумтаълим мактабларининг ҳарбий ватанпарварлик йўналишига ихтисослаштирилган синфлари ўртасида мусобақанинг республика босқичига йўлланма олган ўкувчи-ёшлардан ташкил топган яъни Қорақалпоғистон Республикаси, Тошкент шаҳри ва вилоятлар ҳамда илк маротаба истисно тариқасида Бахт шаҳрида жойлашган республика ўғил болалар ўқув-тарбия муассасасидан жами 15 та жамоалар ғолиблик учун баҳс олиб боришди.
Уч кун давомида ўтказилган мусобақанинг очилиш маросимида барча жамоалар очиқ осмон остида саф тортишди. Ўқувчилар беллашув шартлари бўйича баҳсларга киришиб жисмоний, жанговор ва билим жиҳатдан қанчалик тайёгарликка эга эканликларини намойиш этдилар.
Улар жамоани таништириш, билимдонлар беллашуви, заҳарланган ҳудуддан ўтиш, ўқ-дориларни белгиланган жойга етказиш ва ўкдонга жойлаш, калашников автоматини нотўлиқ қисмларга ажратиш ва йиғиш, биринчи тиббий ёрдам кўрсатиш, 400 метрга эстафета, сувли тўсиқ устидан ўтиш, турникда тортилиш, саф тайёргарлиги каби шартларни бажаришди.
Ўқувчиларнинг кўрсаткичлари ҳакамлар ҳайъати томонидан ҳолис баҳолаб борилиб, мусобақа ғолиблари аниқланди. Унга кўра 3-ўринга Қорақалпоғистон Республикаси жамоаси сазовор бўлган бўлса, 2 ўринни Наманган вилояти жамоаси эгаллади ва 1-биринчи ўринга Навоий вилояти жамоаси муносиб деб топилди.
Тантанали тақдирлаш маросимида ғолиб жамоаларга мусобақа медали, кубок, фахрий ёрлиқ ҳамда ҳамкор ташкилотларнинг совғалари, копьютер жамланмаси ва биринчи ўрин эгаларига велосипедлар топширилди.
Тадбир сўнгида ҳарбий оркестор, фахрий қоровул бўлинмаси чиқишлари ҳамда куй-қўшиқлар ёшлар учун ҳавола этилди.
Сўзимиз якунида бу ёшларнинг ақл заковатини, шижоати, мардлик ва жасурлигини кўриб ҳақиқий гвардиячилар издошлари етишиб келаётганлигини ишонч билан айтаоламиз.
