Ёшларнинг бўш вақтини унумли ўтказиши, уларнинг маънавий камолотини юксалишига хизмат қилади
Мустақиллигимизнинг 32 йиллиги байрами арафасида Сирдарё вилояти Бахт шаҳрида жойлашган Республика ўғил болалар ўқув-тарбия муассасаси тарбияланувчилари учун ташкил этилган саёҳат жуда мазмунли ўтди десак муболаға бўлмайди. Ўқувчилар даставвал Тошкент шаҳрида бунёд этилган Янги Ўзбекистон боғида бўлишди ва у ерда Миллий гвардия қўмондонлиги мутасадди раҳбарлари ёшлар билан самимий мулоқот қилиб, совғалар тақдим этишди.
Шундан сўнг, тарбияланувчилар ҳиёбонда яратилган замонавий шароитлар билан танишиб, боғдаги сунъий кўл, спорт майдончалари, болалар ўйингоҳлари, амфитеатр, фавворалар, савдо ва хизмат кўрсатиш объектлари, ҳунармандчилик дўконларини томоша қилишди.
Шунингдек, «Ғалаба боғи» ёдгорлик мажмуаси ҳамда унинг ҳудудидаги «Шон-шараф» давлат музейига бўлган ташриф бўлса, тарбияланувчиларни мозий билан юзлашишига сабаб бўлди. Ўзбек халқининг Иккинчи жаҳон уруши йилларидаги шонли тарихини, она халқимизнинг қаҳрамонлигини яхлит акс эттирган мазкур мажмуа ўқувчиларда ёрқин таассуротлар қолдирди.
Тадбир сўнгида, ҳарбий қисмда намойиш этилган концерт дастури ҳамда кўргазмали чиқишлар тарбияланувчиларни ҳарбий ватанпарварлик руҳида тарбиялашга, уларнинг она юртга меҳри ва садоқатини янада ортишига туртки бўлади деб ишонамиз
