ЮРТ ТИНЧЛИГИ САДОҚАТЛИ ҲАРБИЙЛАРДА, ЭРТАСИ ЁШЛАР ҚЎЛИДА
Миллий гвардия Навоий вилояти бўйича бошқармаси ҳамда Ёшлар иттифоқи вилоят кенгаши ҳамкорлигида Навоий шаҳридаги 13-сонли умумтаълим мактабида “Менинг отам юрт ҳимоячиси” шиори остида давра суҳбати ташкил этилди.
Унда давлат ва жамоат ташкилотлари, Иккинчи Жаҳон уруши қатнашчилари ҳамда маҳалладаги нуроний отахонларнинг иштирок этиши учрашувга янада мазмун бағишлади.
Тадбирда сўзга чиққанлар ҳозирги кунда ҳарбий хизматчиларга яратилаётган шарт-шароитлар, она Ватан равнақи йўлида хизмат фаолиятини олиб бораётган ўғлонлар ҳақида фахр билан сўзлаб беришди. Ўқувчи ёшларни илғорлар изидан эргашишга, ватанпарвар бўлишга даъват этишди.
Ёшлар ўртасида ташкил этилган спорт мусобақалари, ҳарбийлар томонидан ташкиллаштирилган жанговор чиқишлар ҳамда қурол-аслаҳалар намойиши ўқувчиларнинг ҳарбий соҳага бўлган қизиқишларини янада оширди.