Миллий гвардия қўмондони ўринбосари полковник С.Мамаюсупов Тошкент вилоятидаги мактабларга бириктирилган инспектор-психологлар билан учрашув ўтказди.
Йиғилишда мактаб инспектор-психологларининг 2023-2024-йил якунлари бўйича фаолияти якунлари муҳокама қилинди. Таҳлилларда мактабларда давомат сезиларли даражада ошгани таъкидланди. Жумладан, жорий йилнинг март ойида ўқувчиларнинг 30 фоиздан ортиғи сабабсиз дарсларга қатнашмаган бўлса, олиб борилган тадбирлар натижасида 25 май ҳолатига кўра давомат 98,5 фоизни ташкил этган. Бу Миллий гвардия, Мактабгача ва мактаб таълими вазирлиги ҳамда “маҳалла еттилиги”нинг самарали ҳамкорлигидан далолатдир.
Шу билан бирга, ўқувчи ёшлар ўртасида ҳуқуқбузарлик ва жиноятларнинг олдини олиш, узоқ муддатга чет эл давлатларига чиқиб кетган ва у ерда ноқонуний бўлиб турган вояга етмаганларни яшаш жойига қайтариш ва таълимга жалб этиш вазифаси долзарблигича қолмоқда. Қўмондон ўринбосари, инспектор-психологлар ва “маҳалла еттилиги” ўсмирларнинг ота-оналари ва яқинлари билан профилактик тушунтириш ишларини олиб бориши, уларни яшаш жойидаги умумтаълим мактабларида навбатдаги ўқув йилида ўқишни давом эттиришига алоҳида эътибор қаратиш зарурлигини таъкидлади.
Шунингдек, инспектор-психологларнинг болалар соғломлаштириш оромгоҳларида дам олаётган ўқувчилар билан маданий-маърифий, спорт ва ватанпарварлик тадбирларини мунтазам олиб бориши кераклиги айтиб ўтилди.
Бундан ташқари, йиғилишда Миллий гвардия инспектор-психологларининг хизмат интизомини мустаҳкамлаш, жисмоний ва жанговар тайёргарлиги сифатини ошириш масалалари муҳокама қилинди.
Конструктив танқидий руҳда ўтган йиғилишда бошқа долзарб масалалар ҳам муҳокама қилинди.
Бундай учрашувлар республикамизнинг бошқа ҳудудларида ҳам ўтказилмоқда.
